زیانەکانی لافاوی دوێنێ شەو لە سلێمانی چی بووە؟

پێشەوا محەمەد

جگە لە زیانگەیاندن بە چەند ماڵێک، لافاوەکەی دوێنێ شەو هیچ زیانێکی گیانی لێنەکەوتووەتەوە، ئەوە زانیاریی بەرگری شارستانی و فریاکەوتنی خێرای سلێمانییە بۆ 964.

ئارام عەلی، وتەبێژی بەرگریی شارستانی سلێمانی بە 964ـی راگەیاند، چەند ماڵێک لە گەڕەکەکانی کەنەکەوە و تاسڵوجە ئاو چووبووە ناو ماڵەکانیان و لە کاتی خۆیدا چارەسەر کرا.

وتیشی، “لە بازیان و پیرەمەگرونیش هەمان حاڵەت هەبووە و تەنیا ئاو چووەتە ناو ماڵەکانەوە و هیچ زیانێکی دیکەی نەبووە”.

بەهۆی ئەو شەپۆلە بەهێزەی بارانبارینەوە، کە شەوی رابردوو هەرێمی کوردستانی گرتبووەوە، ناوچەکانی هەرێمی کوردستان بە رێژەی جیاجیا بەر لافاو و پەنگخواردنەوەی ئاو کەوتن، لە شاری سلێمانی لافاو بۆ ماوەیەک رێگای سەرەکەیی تاسڵوجە – سلێمانیی داخست.

سامان نادر، بەڕێوەبەری فریاکەوتنی خێرای سلێمانی بە 964ـی راگەیاند، دوێنێ شەو لە سلێمانی هیچ حاڵەتێکی گیانلەدەستدان یان برینداربوون بەهۆی لافاو و بارانبارینەوە تۆمار نەکراوە.