دەرچوانی ژینگە لە هەڵەبجە خواردنی زیادەی ماڵان دەکەن بە پەین

پێشەوا محەمەد

دەرچوانی بەشی ژینگە لە هەڵەبجە دەیانەوێت خواردنی زیادەی ماڵان بکەن بە پەین، فەرمانگەی ژینگەی شارەکەش دەڵێت هاوکاریان دەبن.

بەوتەی سەرهەنگ عەبدولڕەحمان، بەڕێوەبەری فەرمانگەی ژینگەی هەڵەبجە، کە قسەی بۆ 964 کردووە، پڕۆژەی ئەو دەرچوانە بە دوو قۆناغ جێبەجێ دەکرێت، قۆناغی یەکەم هۆشیارکردنەوەی هاوڵاتیانە بەوەی ئامادەکردن و لێنانی خواردن کەم بکەنەوە و قۆناغی دووەمیش کۆکردنەوەی خۆراکی زیادەیە و کردنیەتی بە پەین.

وتیشی، “هێشتا پڕۆژەکە نەچووەتە قۆناغی جێبەجێکردنەوە و داوای دەرخستەمان لێکردوون و دواتر دەیخەینە ناو پڕۆژە ستراتیژییەکانی فەرمانگەکەمانەوە بۆ جێبەجێکردن”.

“ئێمە هاوکاریان دەبین و هەوڵ دەدەین بودجەیان لە حکومەت یان رێکخراوە ژینگەییە نێودەوڵەتییەکان بۆ بەردەست بخەین و پڕۆژەکەیان جێبەجێ بکەن”، ئەوەش قسەی سەرهەنگ عەبدولڕەحمانە.