لە سلێمانی
مامەڵەی كڕین و فرۆشتن بە دۆلارەوە بووەتە دیاردە
+964
ئەحمەد محەمەد – سلێمانی
ماوەیەك دەبێت هاوڵاتیان مامەڵە بە دۆلاری ئەمەریكی دەكەن، بە مەبەستی قازانج، پسپۆڕانی بواری دراو دەڵێن ” لە حاڵەتەوە بووەتە دیاردە “ .
ساڵێكە دۆلاری ئەمەریكی بەرامبەر دیناری عێراقی بەرزی و نزمی دەكات، ئەمەش وایكردووە هاوڵاتیەكی زۆر مامەڵە بكەن بەو جۆرە دراوەوە.
جەبار گۆران، پسپۆڕی بواری دارایی و وتەبێژی بازاڕی ئاڵوگۆڕی دراو لە سلێمانی ، بۆ 964 وتی ” نزیكەی شەش مانگ دەبێت بووەتە دیاردە و بە هۆی بێكاری و بێموچەییەوە، بەشێكی هاوڵاتیان روو دەكەنە بازاڕەكانی دراو و مامەڵە دەكەن بە مەبەستی سوود و قازانج “ .
ئاماژەی بەوەش دا ، “هاوڵاتیانی زۆر رووبەڕووی زەرەرو زیان بوونەتەوە، هاوڵاتیان ئەگەر شارەزاییەكی باشیان نەبێت بۆ ئەو جۆرە مامەڵانە، لەوانەیە چەندین جاری دیكە زەرەرمەندبن“ .
“هاوڵاتیان بە گشتی واباشترە خۆیان لە مامەڵە و یاری ئەم بازاڕانە بە دوور بگرن، تا دووربن لە زەرەرو زیان، لەبەرئەوەی هیچ داتا و زانیاری و پێشبینییەكی دروست نییە بۆ شرۆڤەكردنی دۆخی دارایی عێراق و بەهای دیناری عێراقی”، جەبار گۆران ئەمەی بۆ 964 وت.
پێداچوونەوە: ئەرسەلان عەبدوڵا