بۆ ئەو منداڵانەیە کە نەکوتراون
هەڵمەتێکی 10 رۆژەی کوتان لە کۆیە دەستیپێکردووە
964+
پێشەوا محەمەد
تەندروستیی کۆیە هەڵمەتێکی کوتانی بۆ ئەو منداڵانە دەستپێکردووە، کە بە هەر هۆکارێک بێت کوتانەکانیان دواکەوتووە و ماوەی 10 رۆژ بەردەوام دەبێت.
هەڵمەتەکە بۆ ئەو منداڵانەیە کە لە وادەی کوتانی ساڵانەیان بە پێی دەفتەری کوتانەکەیان دواکەوتوون و ئەوانە دەگرێتەوە کە تەمەنیان خوار پێنج ساڵانە.
هاوکار عەلی، وتەبێژی تەندروستی کۆیە بە 964ـی راگەیاند، بەشێک لە منداڵان بەهۆی کەمتەرخەمیی دایک و باوکیان یان دوورەدەستیان لە بنکە تەندروستییەکان بەتایبەت ئەوانەی لە گوندەکانن کوتانیان دواکەوتووە و هەڵمەتەکە بۆ ئەوانە.
وتیشی، “نەکوتانی ئەو منداڵانە کێشەیە و کەیسمان هەیە بەهۆی نەکوتانیانەوە منداڵ تووشی ئیفلیجی بووە یان کێشە لە چاو و مێشکیاندا دروست بووە”.
ماوەی چوار رۆژە ئەو هەڵمەتە بەردەوامە و شەش رۆژی تری ماوە.
“تیمی گەڕۆکمان دروست کردووە و کۆڵان کۆڵان و گوندا و گوند دەگەڕێن و هەر منداڵێک بەپێی دەفتەرەکەی نەکوترابێت یان دواکەوتبێت کوتانەکەی بۆ ئەنجام دەدەرێت”، ئەوەش قسەی هاوکار عەلییە.