ئه‌مڕۆ “مێسی به‌غدا” ده‌یه‌مین فێستیڤاڵی دهۆك بۆ سینه‌ما ده‌كاته‌وه‌

ئەرسەلان عەبدوڵا

بڕیاره‌ ئه‌مڕۆ شه‌ممه‌ 9.12.2023 چالاکییەکانی خولی دەیەمینی فێستیڤاڵی نێودەوڵەتیی فیلمی سینه‌مایی له‌ دهۆک ده‌ستپێبكات، کە تێیدا 116 فیلمی كوردی و بیانی بەشداری دەکەن.

فێستیڤاڵی ئه‌مساڵی سینه‌ما له‌ دهۆك به‌ ناونیشانی “زمانی كوردی” لە هۆڵی کۆنفڕانس دەستپێدەکات و بڕیاره‌ تا 16ی ئه‌م مانگه‌ به‌رده‌وام بێت.

حەسەن عارف وتەبێژی فێستیڤاڵی نێودەوڵەتی دهۆک پێشتر بە 964ـی وت، لە سەرەتای کردنەوەی دەرگای وەرگرتنی فیلمه‌كان لە 1.6.2023 نزیکەی 700 فیلمی بیانی و کوردی پێشکەشکران، بەڵام دواجار دوای هەڵسەنگاندن 116 فیلم هەڵبژێردران.

هه‌روه‌ها ئه‌وه‌شی راگه‌یاند، فێستێڤاڵه‌كه‌ به‌ فیلمی “مێسی به‌غدا” ده‌ستپێده‌كات، كه‌ له‌ ده‌رهێنانی سه‌هیم عومه‌ر خه‌لیفه‌یه‌ و خاوه‌نی ده‌یان خه‌ڵاتی جیهانییه‌.

بڕیاره‌ فیلمه‌كانی فێستیڤاڵه‌كه‌ جگه‌ له‌ هۆڵی كۆنفرانس، له‌ زانكۆی دهۆك، سینه‌ما دهۆك مۆڵ و هه‌روه‌ها له‌ ناو چاكسازیی گه‌ورانی زه‌ركا بۆ زیندانییه‌كانیش نمایش بكرێت.

به‌ پێی زانیارییه‌كانی 964، له‌و 116 فیلمه‌ی له‌ فێستیڤاڵه‌كه‌ نمایش ده‌كرێن، 57 فیلمیان پێشبڕكێ بۆ بردنه‌وه‌ی خه‌ڵاته‌كان ده‌كه‌ن.