دیمەنێک لە بەڕێوبەرایەتی گشتی پەروەردەی سلێمانی - وێنە: راگەیاندنی پەروەردەی سلێمانی
"پشتیوان و داکۆکیکەری مافەکانی مامۆستایان دەبین"
ئەنجومەنی پەروەردەی سلێمانی بۆ مامۆستایان: دووشەممەی داهاتوو بچنەوە قوتابخانەکان
964+
پێشەوا محەمەد
ئەنجومەنی بەڕێوەبەرایەتیی گشتیی پەروەردەی سلێمانی لە بەیاننامەیەکدا داوا لە مامۆستایانی میلاک و وانەبێژ دەکات، رۆژی دووشەممەی داهاتوو 27.11.2023 بچنەوە هۆڵەکانی خوێندن.
لە بەیاننامەکەدا ئەنجومەنەکە دەڵێت، سەرەڕای لەبەرچاوگرتنی سەختی و دژواریی بارودۆخی مامۆستایان، بەڵام ئەمجارەش با پێکەوە شان بدەنەوە بەر کردنەوەی دەرگای قوتابخانەکان و چیتر خوێندنی قوتابیان نەفەوتێت.
ئەنجومەنی بەڕێوەبەرایەتیی گشتیی پەروەردەی سلێمانی ئاماژەی بەوەش داوە، “ئێمە پشتیوان و داکۆکیکەری مافەکانی مامۆستایان دەبین و بە داواکاریی خۆمانی دەزانین و داواش لە وەزارەتی پەروەردە دەکەین داوکارییەکانی مامۆستایان جێبەجێ بکات”.
عومەر محەمەد، یاریدەدەری بەڕێوەبەری گشتیی پەروەردەی سلێمانی بە 964ـی راگەیاند، “بە گشتی سەندیکا و رێکخراو بەیاننامە دەردەکات، بەڵام ئێمە وەک ئەنجومەن دەرکردنی ئەو بەیاننامەمان بەلاوە باش بوو”.
وتیشی، “وەک لە بەیاننامەکەشدا هاتووە، ئێمە داواکارین مامۆستایان بچنەوە قوتابخانەکان و ئێمەش داکۆکی لە داخوازییەکانیان دەکەین، چونکە نەکردنەوەی قوتابخانەکان چارەنووسی قوتابیان و خوێندن بەرەو نادیار دەبات”.
70 رۆژە خوێندنی ساڵی نوێ دەستیپێکردووە، بەڵام لە پارێزگاکانی سلێمانی و هەڵەبجە و ئیدارە سەربەخۆکانی گەرمیان و راپەڕین تا ئێستا خوێندن دەستی پێنەکردووە.
