چەند کارمەندێک لە کاتی چاکسازی ستوونێکی کارەبای پارکەکە و دیمەنێکی پارکەکە لە شەودا - وێنە: باخچەکانی سلێمانی
پارکی ئازادی رووناک دەکرێتەوە
964+
پێشەوا محەمەد
لەگەڵ نزیکبوونەوەی وەرزی بارانبارین، بەڕێوەبەرایەتیی باخچەکانی سلێمانی چاکسازی لە رووناککەرەوەکانی پارکی ئازادی دەکات و لە هەرکوێیەک گڵۆپ، بلاجکتۆر یان ستوونێک کێشەی هەبوو چاکیان دەکاتەوە.
پارکی ئازادی لە ژێر نۆژەنکردنەوەی تەواوی بەشەکانیدایە و بە پێی زانیارییەکانی 964، تەواوبوونی نۆژەنکردنەوەکە ساڵێکی دیکەی پێویست دەبێت.
عەلی حامید، وتەبێژی بەڕێوەبەرایەتیی باخچەکانی سلێمانی بە 964ـی راگەیاند، ئەوەی ئێستا دەکرێت چاکسازیکردنی مانگانە و وەرزییە و بەهۆی هاتنی وەرزی بارانبارینەوە دەکرێت.
وتیشی، “پڕۆژەی چاکسازیکردن لە تەواوی ژێرخانی کارەبای پارکەکە لە چوارچێوەی نۆژەنکردنەوەی پارکەکەدایە و ئەویش دەستی پێدەکرێت و ئەنجام دەدرێت و هەموو پارکەکە رووناک دەکرێتەوە”.
پارکی ئازادی لە سلێمانی رووبەرەکەی 176 دۆنمە، بە هەشت قۆناغ نۆژەن دەکرێتەوە و دوو ملیار دیناری بۆ دابین کراوە.
