لە سەیدسادق بۆڕی ئاو بۆ 750 ماڵ رادەکێشرێت

ژووری هەواڵ

بە نزیکەی نیو ملیار دینار، پرۆژەیەکی نوێی راکێشانی تۆڕی ئاو لە سەیدسادق جێبەجێدەکرێت و 750 ماڵ لێی سودمەند دەبن.

لەرێگەی پرۆژەکەوە، ئاو بۆ ماڵەکانی گەڕەکی کەنی زەرد دابیندەکرێت و خەرجییەکەی 407 ملیۆن و 378 هەزار دینارە.

کۆمپانیایەک بەناوی خۆشکار پرۆژەکە جێبەجێدەکات و بەدرێژای نۆ هەزار مەتر بۆڕی تیرە جیاواز بەکاردەهێنرێت.

ئەمڕۆ یەکشەممە 22.10.2023، بەڕێوەبەرایەتی ئاوی دەوروبەری سلێمانی لەبارەی پرۆژەکەوە رایگەیاند، خەرجییەکەی لەسەر بودجەی پەرەپێدانی پارێزگاکان دابیندەکرێت و بڕیارە لە ماوەی 180 رۆژدا تەواو بکرێت.

لە ساڵی 2018 ئاوەڕۆی لوولەیی لە گەڕەکی کەنی زەرد جێبەجێکرا، بەڵام هێشتا کێشەی کەمئاوی ئەو گەڕەکە بەتەواوی چارەسەر نەکراوە.