به‌ده‌ستڕێژى گولـله خرایه خواره‌وه
سه‌رچاوه‌یه‌ك: درۆنه‌كه‌ى رانیه وێنه‌ى بیناى ئاسایشی گرتبوو
964+
ژێوار خدر – راپەڕین
كه‌مێك له‌مه‌وبه‌ر له‌ناو رانیه، ناوه‌ندى ئیداره‌ى سه‌ربه‌خۆی راپه‌ڕین، درۆنێك له‌لایه‌ن ئاساییشه‌وه خرایه خواره‌وه و سه‌رچاوه‌یه‌كیش ئه‌و هه‌واڵه‌ى بۆ 964 پشتڕاستكرده‌وه.
خستنه‌خواره‌وه‌ى درۆنه‌كه، لە نزیکی پارکی دەروازەی قەزای رانیە بووه، کە دەکەوێتە نزیک بینای قایمقامیەت و بەڕێوەبەرایەتی ئاسایشی راپەڕین.
سەرچاوەیەک لە ئاسایشی راپەڕین بە 964ـی وت، درۆنه‌كه بەسەر بینای ئاسایشدا سوڕاوەتەوە بە مەبەستی وێنەگرتن، و هێزەکانی ئاسایشی راپەڕینیش دەستڕێژی گولـلەیان لێکردووە و خستویانه‌ته خواره‌وه.
سەرچاوەکە ئەوەشی وت، کە درۆنەکە هی یەکێک لە کەناڵە ناوخۆییەکانی رانیە بووە.
وتیشی “بەهیچ شێوەیەک رێگەپێدراو نیە کە هیچ دەزگایەکی راگەیاندن بینا و دامودەزگا ئەمنییەکان وێنە بگرێت، بۆیه ئه‌و درۆنه‌ش خراوه‌ته خواره‌وه”.
پێداچوونه‌وه: فه‌رهاد حه‌سه‌ن