بۆ گلدانەوەی ئاو پۆندى هەرەوەزی لە گوندەکان دروستدەکرێت

964+

فەرمان سادق

بە هاوکاری رێکخراوی یونیسێف، حکومەتی هەرێم پۆندی هەرەوەزی بۆ گلدانەوەی ئاو لە گوندەکان دروستدەکات.

ئەم دەستپێشخەرییە ئامانج لێی چارەسەرکردنی کێشەى کەم ئاوى و کاریگەرییەکانى وشکەساڵییە لە گوندەکان و گەشەپێدانى کەرتەکانى کشتوکاڵ و گەشتیارى.

ئەو پۆندانە، لەسەر رێڕەوە ئاوییەکانى باراناو دروست دەکرێن بە مەبەستی نەهێشتنی زیان و مەترسییەکانی لافاو، هەروەها بوونی سەرچاوەیەکى گرنگی ئاوە بۆ کەرتەکانى کشتوکاڵ و گەشتیاری و ئاودێرى.

کاروان سەباح هەورامی، بەڕێوەبەری گشتیی سەرچاوە ئاوییەکانی هەرێمی کوردستان لە کۆنگرەیەکی رۆژنامەوانیدا، ئاماژەی بەوەدا کە ئەو پۆندە هەرەوەزییانە له‌سه‌ر بنه‌مای رێنمایی پۆنده‌كان کە ساڵی 2022 دەرچووە، بۆ گوندنشین و جوتیاران دروست دەکرێن بە مەرجێک کە سوودی گشتی لەبەرچاو بگیردرێت.
هه‌رێمی كوردستان، بەهۆی گۆڕانی ئاوهەواوە رووبەڕووی گرفت دەبێتەوە وەکو دووباره‌بوونه‌وه‌ی وشكه‌ساڵی و که‌مبوونه‌وه‌ی ئاستی ئاوی ژێرزه‌وی و لێدانی زۆری بیره‌ قووڵه‌كان.

به‌ گوێره‌ی رووپێوی به‌ڕێوه‌به‌رایه‌تی گشتی سه‌رچاوه‌كانی ئاو بێت، نزیكه‌ی 800 گوند مه‌ترسیی وشكبوونی سەرچاوەى ئاو و چۆڵبوونیان له‌سه‌ره‌.

بەڕێوەبەری گشتیی سەرچاوە ئاوییەکانی هەرێمی کوردستان دەڵێت: ئەم پرۆژەیە، سنوورێک بۆ‌ هەڵگۆزینی ئاوی ژێرزه‌وی دادەنێت و گلدانەوەى باراناو زیاتر دەکات، دەبێتە هۆکارێکیش بۆ مانەوەی گوندنشینان و چۆڵنەبوونى گونده‌كان.

لە کابینەی نۆیەمدا، رەزامەندیی لەسەر دروستکردنی 41 پۆند داوە، کە نۆ پۆندیان بەشێوەی (ppp) دروست کردووە،  تێچووەکەشی 106 ملیار دینارە.