بۆ گەشت چووبوون
لە دەربەندیخان.. هەرەسی شاخ دوو شاخەوانی کوشت
964+
هونەر فارس- دەربەندیخان
سێ شاخەوان بۆ گەشت دەچنە تونی بابا عەمرە، بەهۆی هەرەسهێنانی شاخەوە دوانیان گیانیان لەدەستدا.
دوان لە شاخەوانەکان دانیشتووی شاری سلێمانین و ئەوەی تریشیان دانیشتووی قەزای دەربەندیخانە، ئەوان بەیانی ئەمڕۆ 20.5.2023 بە مەبەستی گەشتکردن هاتوونەتە تونی بابا عەمرە لە نزیک قەزای دەربەندیخان.
سەرچاوەیەک لە ئاسایشی دەربەندیخان زانیاریەکانی بۆ 964 پشتڕاستکردەوە و جەختی لە گیانلەدەستدانی دوو شاخەوانەکە و بریندار بوونی یەکێکی دیکەیان کرد.
تونی بابا عەمرە دەکەوێتە سنوری قەزای دەربەندیخان و شوێنێکی سەرنجڕاکێشە بەلای گەشتیارانەوە و بووەتە جێگەی گەشتی گروپە شاخەوانییەکان.
هۆکاری گیانلەدەستدانی دوو شاخەوانەکەشی بۆ ئەوە گەڕاندەوە کە بەهۆی نالەباری کەشوهەوا بووە، بەشێک لە شاخی تونی بابا هەرەسی هێناوە و شاخەوانەکان کەوتنە ژێری.
ئەو سەرچاوەیە ئاماژەی بەوەشکرد، ئەو سێ شاخەوانە لە گەشتەکەیاندا کەسی دیکەیان لەگەڵ نەبووە و ئێستا تەرمەکانیان لە پزیشکی دادی دەربەندیخانە.