لە یەکەم بەیانیی قوتابخانەدا؛ شەقامەکان چاویان لە منداڵان بوو

ئەحمەد مستەفا

لەگەڵ هەڵاتنی خۆر و دەنگی یەکەم زەنگی قوتابخانەکان، شەقامەکانی هەرێمی کوردستان جارێکی تر پڕ بوون لە جلە رەنگاوڕەنگەکانی قوتابیان و دەنگی پێکەنینی منداڵان، بەڵام لە پشت ئەم دیمەنە خۆشەدا، هەموو هەنگاوێک پێویستی بە وریایی هەبوو.

بەڕێوەبەرایەتی هاتوچۆی هەرێمی کوردستان بەبۆنەی دەستپێکردنی وەرزی نوێی خوێندن، پیرۆزبایی لە قوتابیان و مامۆستایان کرد و لە شۆفێران خواست خێراییەکانیان کەم بکەنەوە.

بە تایبەتی لە ناوچە نیشتەجێبووەکان و بەردەم قوتابخانەکان، چونکە لەو شوێنانەدا هەر هەنگاوێکی بچووک دەتوانێت جیاوازییەکی گەورە دروست بکات، یان رۆحی کەسێک بخاتە مەترسییەوە.

هەروەها داوای لە شۆفێرانی پاسەکانی قوتابیان کرد، ژمارەی یاسایی سەرنشینان تێپەڕ نەکەن و رێگە بە منداڵان نەدەن لە پەنجەرەکانەوە جەستەیان دەربکەن، ئەمەش لە راگەیەندنێکی هۆشیار ئەمڕۆ یەکشەممە باسی کردووە.

کۆتا پەیامی بەڕێوەبەرایەتی هاتوچۆی هەرێمی کوردستان رووی لە دایک‌ و باوک و مامۆستایانە، ئەوان داوا دەکەن، منداڵان فێری ئەوە بکرێن لەسەر شەقامەکان تەنیا لە شوێنی دیاریکراو بپەڕنەوە، چونکە گەڕانەوەی هەر منداڵێک بە سەلامەتی بۆ ماڵ، باشترین کۆتایییە بۆ هەر رۆژێکی خوێندن.