دوای مانگێک داهاتی نانەوتی سلێمانی و هەڵەبجە 10 ملیار دیناری تێپەڕاند

شۆڕش قادری

دوای زیاتر لە مانگێک، ئەم هەفتەیە داهاتی نانەوتی پارێزگاکانی سلێمانی و هەڵەبجە بەهەردوو ئیدارەی گەرمیان و راپەڕینەوە لە 10 ملیار دینار تێپەڕی.

بەپێی نوێترین داتا و ئاماری ماڵپەڕی شەفافیەت، داهاتی نانەوتیی هەردوو پارێزگای سلێمانی و هەڵەبجە و هەردوو ئیدارەی راپەڕین و گەرمیان لە رۆژی 12.9.2026ـەوە تا ئەمڕۆ هەینی 18.9.2026، 10 ملیار و 750 ملیۆن و 779 هەزار و 188 دینارە، لەکاتێکدا هەفتەی پێشوو تەنیا حەوت ملیار و 162 ملیۆن و 753 هەزار و 977 دینار بوو و مانگێک زیاتر بوو هەفتانە ئەو داهاتە لە حەوت ملیار دیناردا مابووەوە.

لە داهاتی ئەم هەفتەیەی پارێزگاکانی سلێمانی و هەڵەبجە، بڕی 9 ملیار و 537 ملیۆن و 881 هەزار و 838 دیناری بە شێوەی نەختینە و ملیارێک و 212 ملیۆن و 897 هەزار و 350 دیناریشی چەکە.

ماڵپەڕی شەفافییەت هەموو هەفتەیەک داهاتە نانەوتییەکانی هەریەکە لە پارێزگاکانی سلێمانی، هەڵەبجە و ئیدارە سەربەخۆکانی گەرمیان و راپەڕین دەخاتەڕوو.

ئەو داهاتەی ماڵپەڕەکە ئاشکرای دەکات، لە دەروازە سنوورییەکان، فڕۆکەخانە، گومرگ، کرێی کێش و پێوەرەکان، پێبژاردن و سزای دارایی، پشکنینەکان، رسووماتی بەخشین، ژینگەی ئۆتۆمبێل، تابلۆ و داهاتی شارەوانییەکان، بەدەستهاتووە.