لە سلێمانی دوو دز نزیکەی هەشت دەفتەر دۆلاریان دزی بەڵام دواجار گیران – وێنە؛ پۆلیسی سلێمانی
لە سلێمانی
دوو بۆرە دز نزیکەی هەشت دەفتەر دۆلاریان دزی؛ قۆڵبەست کران
964+
شۆڕش قادری
لە گەڕەکی راپەڕینی سلێمانی، دوو بۆرە دز نزیکەی هەشت دەفتەر دۆلاریان لە ماڵێک دزی، بەڵام بۆیان نەچووەسەر، پۆلیس دۆزینیەوە و قۆڵبەستی کرد.
بەڕێوەبەرایەتی پۆلیسی سلێمانی لە راگەیەنراوێکدا دەڵێت، “دوای ئەوەی هاوڵاتییەک لە نوسینگەی نەهێشتنی تاوانی راپەڕین سکاڵای تۆمارکرد کە دزی لەماڵەکەی کراوە و بڕی 60 ملیۆن دینار و 38 هەزار دۆلاری ئەمریکی لێدزراوە، پەڕاوی لێکۆڵینەوە بۆ رووداوەکە کراوەتەوە و دوای لێکۆڵینەوە و بەدواداچوون، توانراوە لەلایەن مەفرەزەکانی نوسینگەی نەهێشتنی تاوانی راپەڕینەوە، دوو تۆمەتبار بدۆزرێنەوە و دەستگیربکرێن”.
لەکاتی دەستگیرکردنی ئەو دوو دزە، هەندێک لە پارە دزراوەکە دەستی بەسەرداگیراوە کە بڕی 28 ملیۆن و 550 هەزار دیناری عێراقی و 27 هەزار و 600 دۆلاری ئەمریکی بووە.
سەبارەت بە باقی پارەکەی تر پۆلیسی سلێمانی دەڵێت، دزەکان قاڵبێک زێڕیان پێکڕیوە کە 100 گرامە، ئەویشیان بۆ قوت نەچوو و لێیان سەنرایەوە.
تۆمەتباران بەناوەکانی (م، ع، ش) و (س، ئ ، م )، بەبڕیاری دادوەر و بەپێی ماددەی (444) لەیاسای سزادانی عێراقی راگیراون و لێکۆڵینەوە لەگەڵیاندا بەردەوامە.