بەرگری شارستانی رێنماییت پێدەڵێت
ئەگەر لەناو بەفردا بە ئۆتۆمبێلەوە گیرت خوارد چی دەکەیت؟
964+
فەرهاد حەسەن
بەڕێوەبەرایەتیی گشتیی بەرگریی شارستانی هەرێم، رێنمایی و ئامۆژگاری بە هاوڵاتیان دەدات کە ئەگەر لەناو بەفر مانەوە چی بکەن ؟ بۆ ئەمەش چەند خاڵێکە بۆ سەلامەتی گیانی هاوڵاتیان خستووەتەڕوو.
ئاماژە بەوەدەکات، گیرخواردن لەناو بەفردا بارودۆخێکی ترسناکە، بەڵام پاراستنی هێمنی و ئەنجامدانی هەنگاوی دروست ژیانت رزگار دەکات، لێرەدا گرنگترین ئەو کارانە هەن کە پێویستە هاوڵاتی لەوکاتانەدا بیکاتم بەتایبەتیش ئەگەر بە ئۆتۆمبێلەوە لەناو بەفر گیری خواردبوو؛
– لەناو ئۆتۆمبێلەکەتدا بمێنەرەوە
دوور مەکەوەرەوە: مەبەستت نەبێت بەپێ بەناو بەفردا بڕۆیت بۆ گەڕان بەدوای یارمەتی، مەگەر دڵنیابیت کە شوێنێکی نیشتەجێبوون، زۆر لێتەوە نزیکە، لە کاتی بەفرباریندا زوو رێگا ون دەکەیت و سەرمایەکی زۆرت لێ نیشتێت.
ئۆتۆمبێل باشترین پەناگەیە: ئۆتۆمبێلەکەت وەک نیشانەیەک وایە بۆ تیمەکانی فریاگوزاری بۆ ئەوەی زووتر بتدۆزنەوە.
– گەرمکردنەوەی ناو ئۆتۆمبێل بە وریاییەوە
پاککردنەوەی گزۆز: پێش ئەوەی ئۆتۆمبێلەکە دابگیرسێنیت، دڵنیابەوە کە لوولەی گزۆزەکە بە بەفر نەگیراوە، ئەگەر گیرابێت، گازی یەکەم ئۆکسیدی کاربۆن دەگەڕێتەوە ناو ئۆتۆمبێلەکە و دەبێتە هۆی خنکان.
دایگیرسێنە بۆ ماوەی کەم: تەنیا بۆ ماوەی 10 خولەک لە هەر کاتژمێرێکدا ئۆتۆمبێلەکە دابگیرسێنە بۆ ئەوەی گەرم بێتەوە و بەنزینت پێ بمێنێت.
– پاراستنی گەرمی جەستە
بەکارهێنانی بەرگی زیادە: هەرچی لە ناو ئۆتۆمبێلەکەدا هەیە (پەتوو، چاکەت، یان تەنانەت فەرشی ناو ئۆتۆمبێلەکەش) بەکاربهێنە بۆ داپۆشینی جەستەت.
جوڵە بکە: دەست و قاچەکانت بجوڵێنە بۆ ئەوەی سوڕی خوێنت چالاک بێت، بەڵام خۆت زۆر ماندوو مەکە و ئارەق مەکە، چونکە ئارەقە جەستەت سارد دەکاتەوە.
– ئاماژەدان بۆ فریاگوزاری
رووناکی دابگیرسێنە: لایتی ناوەوەی ئۆتۆمبێلەکە دابگیرسێنە (لە شەودا باشتر دەبینرێت).
نیشانەیەکی رەنگاوڕەنگ: ئەگەر پارچە قوماشێکی سوور یان رەنگێکی تۆخت پێیە، لە پەنجەرەی ئۆتۆمبێلەکە یان بە ئەنتێنەکەیەوە بیبەستە.
پەیوەندی بکە: ئەگەر شەبەکەی مۆبایل هەبوو، خێرا پەیوەندی بە ژمارە فریاگوزارییەکانەوە بکە و شوێنی خۆت دیاری بکە.
– خواردن و خواردنەوە
بەفر مەخۆ: خواردنی بەفر پلەی گەرمی جەستەت دادەبەزێنێت، ئەگەر تینووت بوو، بەفرەکە بتوێنەرەوە ئینجا بیخۆرەوە.
بەکارهێنانی وزە: ئەگەر خواردنی وەک چوکلێت یان وشکەباراتت پێیە، بە کەمی بیخۆ بۆ ئەوەی وزەی جەستەت بپارێزیت.
لەناوشار و دەرەوەی شاریش سەدان ئۆتۆمبێل لە کۆیە گیریان خواردووە
