دیمەنێکی بارانبارین لە یەکێک لە شەقامەکانی کوردستان - وێنە: ئەرشیفی 964
بەفر چیاکان سپی دەکات و باران زۆربەی ناوچەکان دەگرێتەوە
ئەمڕۆ و سبەی کاتی سۆپای دار و پیاسەی ژێر بارانە
964+
ژێوار خدر
بەم هەینییە جەوەکە تامی دانیشتنی دیوەخان و چای سەر سۆپای دار، یان پیاسەیەکی هێواشی ژێر باران دەدات، ئاسمان هەوری تەواوە و باران ناوبەناو دەبارێت، بۆیە ئەگەر پلانتان هەیە بچنە دەرەوە و ناو بەفر، خۆتان گەرم داپۆشن، چونکە سەرماکە هی گاڵتە نییە و پەتاکەش لەناو دەرگەیە.
بەگوێرەی پێشبینییەکانی کەشناسی، ئەمڕۆ ئاسمان بەگشتی هەوری تەواو دەبێت، نمەباران و بارانی مامناوەند بە پچڕپچڕی زۆربەی ناوچەکان دەگرێتەوە و لە ناوچە شاخاوییە بەرزەکان و سنوورەکانیش بەفر دەبارێت، پلەکانی گەرماش بەراورد بە دوێنێ، یەک بۆ دوو پلە دادەبەزن و سەرماکە زیاتر هەستی پێ دەکرێت.
بۆ سبەی شەممەش دۆخەکە زۆر ناگۆڕێ، سەرەتا ئاسمان هەور دەبێت و دواتر دەگۆڕێت بۆ نیمچە هەور، بارانبارین لە زۆربەی ناوچەکان بەردەوام دەبێت و لە ناوچە سنوورییەکانیش بەفر دەبارێت، پێشبینی دەکرێت کاریگەریی ئەم شەپۆلە تا کاتەکانی شەوی شەممە بمێنێت و دواتر کۆتایی بێت، پلەکانی گەرماش لەسەر تۆمارەکانی ئەمڕۆ جێگیر دەبن.
بەرزترین پلەکانی گەرمای پێشبینیکراو بە پلەی سیلیزی
هەولێر : 14 پلەی سیلیزی
سلێمانی : 14 پلەی سیلیزی
دهۆک : 14 پلەی سیلیزی
زاخۆ: 13 پلەی سیلیزی
کەرکوک : 15 پلەی سیلیزی
هەڵەبجە : 14 پلەی سیلیزی
سۆران: 8 پلەی سیلیزی
ئاکرێ : 12 پلەی سیلیزی
ئامێدی: 9 پلەی سیلیزی
گەرمیان : 16 پلەی سیلیزی
