رووداوەکە لە کەرکوک بووە
شۆفێرەکە 15 ساڵە؛ تووشى رووداوى هاتوچۆ بووە و دوو بریندار و گیانلەدەستدانێکى لێکەوتەوە
+964
وریا فەتاح
بەپێى هەواڵێکی بەڕێوەبەرایەتی هاتووچۆی کەرکوک، بەهۆی رووداوێکی هاتووچۆوە لەسەر رێگای پردی چوارەم و پردی رەشید (دومیز) لە کەرکوک، گەنجێک گیانی لەدەستدا و دوو کەسی دیکەش برینداربوون، کە یەکێکیان شۆفێری ئۆتۆمبێلەکە بوو و تەمەنی 15 ساڵە.
بەڕێوەبەرایەتی هاتووچۆی کەرکوک رایگەیاند، شۆفێرەکە لەدایکبووی ساڵی 2010 یەو مۆڵەتی شۆفێری نییە، بەڵام بە خێرایی 120 کیلۆمەتر لە کاتژمێرێکدا ئۆتۆمبێلێکی جۆری “سورینتۆ”ی لێخوڕیوە و تووشى ئەو رووداوە بووە.
لە رووداوەکەدا، ئۆتۆمبێلەکە لە کۆنترۆڵ دەرچووە و خۆی بە درەختێک و پاشان ستوونێکی کارەبادا کێشاوە و دواتر وەرگەڕاوە، بەهۆیەوە ئۆتۆمبێلەکە بە تەواوی وێران بووە.
محەمەد ئیسماعیل، بەڕێوەبەری هاتووچۆی کەرکوک، دووپاتی کردەوە کە بەڕێوەبەرایەتییەکەیان سکاڵای یاسایی لە دژی شۆفێرەکە تۆمار کردووە، چونکە مێردمنداڵ بووە و زیانی ماددی و گیانلەدەستدانی گەنجەکەی هاوڕێی و برینداربوونی کەسێکی دیکەی لێکەوتووەتەوە.
