لە شەرمولشێخ
ترەمپ و سیسی رێككەوتنی غەززەیان واژۆ كرد
964+
ئەرسەلان عەبدوڵا
كەمێك پێش ئێستا سەرۆكی ئەمریكا و سەرۆكی میسر “رێككەوتنی ئاشتی لە رۆژهەڵاتی ناوەڕاست”یان واژۆ كرد، كۆمەڵێك سەرۆكی دیكەی دنیا لە پشتیانەوە شایەتحاڵ بوون.
رێككەوتنەكە لە شەرمەولشێخ لە میسر كرا و بەڵگەنامەی رێككەوتنەكە لە لایەن سەرۆكی ئەمریكا، سەرۆكی میسر، سەرۆكی توركیا و میری قەتەڕ واژۆ كرا، كە بە ناوی “رێككەوتنی غەززە”یە.
رێككەوتنەكە سەبارەت بە وەستانی شەڕ و ئاشتەواییە لە نێوان ئیسرائیل و حەماس و لە قۆناغی یەكەمدا گۆڕینەوەی دیل و بارمتەكان و وەستانی شەڕ و گەیاندنی هاوكارییەكانە بۆ خەڵكی غەززە.
سەرۆكی ئەمریكا لە میانەی لووتكەكەدا رایگەیاند، “جەنگی سێیەمی جیهانمان ناوێت”.
وتیشی، رێككەوتنی غەززە گەورەترین و گرنگترین رێككەوتنە سەبارەت بە رۆژهەڵاتی ناوەڕاست.
هاوكات ئەمڕۆ لە پرۆسەی ئاشتیی نێوانیاندا، حەماس و ئیسرائیل ژمارەیەك دیل و بارمتەیان گۆڕییەوە و تەرمی دوو بارمتەی ئیسرائیلیش رادەستی خاچی سوور كرا.
ترەمپی سەرۆكی ئەمریكا ئەمڕۆ پێش ئەوەی بگاتە میسر، لە ئیسرائیل بوو.
