وەزارەتی تەندروستی 490 پزیشک دابەشی سەر ناوەندە تەندروستییەكانی هەرێم دەكات

فەرهاد حەسەن

بەپێی بڕیارێكی وەزارەتی تەندروستی 490 پزیشكی خۆلاو دابەشی سەر ناوەندە تەندروستییەكانی هەرێم لە تەواوی پارێزگا و ئیدارە سەربەخۆكان دەكرێت و مەبەستیش لێی بەرزكردنەوەی پلەی ئەم پزیشكانەیە.

نووسراوێکی وەزارەتی تەندروستی كە دوێنێ چوارشەممە بە فەرمانی وەزاری ژمارە 18667 دەرچووە و وەزیری تەندروستیش واژۆی كردووە، باس لە دابەشكردنی ئەم پزیشكانە دەكات و دەڵێت، بڕیاری گۆڕینی ناونیشانی پزیشکی نیشتەجێی خولاو بۆ پزیشکی پلەبەند و پلەبەرزکردنەوە ئەم بڕیارەیان دەركردووە.

بەپێی بڕیارەكە، دابەشكردنی ئەم پزیشكانە بەسەر سەرجەم دامودەزگاکانی تەندروستی دەرەوەی سەنتەری شارەکان بۆ سەرجەم قەزا و ناحیە و گوندەکان لە هەرێمی کوردستانە.

ئاماژە بەوەش دراوە، بڕیارەکە لەپێناو بەرژەوەندی گشتی و تەندروستی هاوڵاتیان و هاوسەنگی و یەکسانی لە دابینکردنی خزمەتگوزاری تەندروستییە.