“وانەی ژیریی دەستکردمان بۆ سەرجەم بەشەكان زیاد كرد”

964+

محەمەد فاتیح

زانكۆی سەڵاحەدین لە هەولێر بڕیاری  دا، بە زیادكردنی وانەی ژیری دەستکرد وەک بابەتێکی گرنگ لە نێو پڕۆگرامی خوێندن بۆ سەرجەم بەشە زانستییەکان و وێژەییەکانی زانکۆكه.

سامان عەبدوڵا، بەڕێوەبەری راگەیاندنی زانکۆی سەڵاحەدین، تایبەت بۆ 964ـی ئاشكرا كرد، دوابەدوای چەندین کۆبوونەوە، زانکۆی سەڵاحەدین بڕیاری دا، وانەی ژیریی دەستکرد لە سەرجەم بەشە زانستی و وێژەییەکانی زانکۆكه دابنێت.

“وانەی ژیریی دەستکرد، وەک هەر وانەیەکی تر تاقیکردنەوەی میدتێرم و  کۆتایی و راپۆرت و ئەسایمێنت و پرێزنتەیشن و کویزی دەبێت و زمانی خوێندن بەو زمانە دەبێت، کە لەوبەشە وانەکانی تری پێدەخوێندرێت”.

زانکۆی سەڵاحەدین، پێشنیازی بۆ وەزارەتی خوێندنی باڵا و توێژینەوەی زانستی کردووە، لە سەرجەم زانکۆکانی تريش ئەم وانەیە بخوێندرێت.

پێشتر عەباس ئەكرەم، وتەبێژی وەزارەتی خوێندنی باڵا و توێژینەوەی زانستی، 964ـی ئاگادار كردەوە، كە زانكۆی سەڵاحەدین بەنیازن بابەتی ژیریی دەستكرد بخوێنن.

زانکۆی سەڵاحەدین لە 16 کۆلیژ و 95 بەشی ئەکادیمی پێکدێت، 25 هەزار قوتابی بکالۆریۆسی هەیە، دوو هەزار  قوتابی خوێندنی باڵا (دبلۆمی باڵا و ماستەر و دکتۆرای هەیە) و ژمارەی مامۆستایانی زانکۆكه دوو هەزار و 300 مامۆستایە بە پلە و پسپۆڕی جیاواز (پڕۆفیسۆر، پڕۆفیسۆری یاریدەدەر، دکتۆر، مامۆستا، مامۆستای یاریدەدەر).

هەواڵی خۆش بۆ خوێندکارانی زانکۆی سەڵاحەدین

بەشەناوخۆییەکەی زانکۆی سەڵاحەدین دوو هەزار خوێندکار دەگرێت