ئاسایشى هەولێر:
مامەڵەکردن بە فۆڕێکس و دراوە ئەلیکترۆنییەکان قەدەغەکرا
964+
وریا فەتاح
ئاسایشى هەولێر بڕیاریدا، مامەڵەکردن بە هەموو جۆرە دراوەکاێکى ئەلیکترۆنى قەدەغە بکات، دەشڵێت: کۆمپانیاکانى فۆرێکس و دراوە ئەلیکترۆنییەکان لە هەرێمى کوردستان و عێراقدا رێگەپێدراو نین.
بەڕێوەبەرایەتى ئاسایشى ئابوورى سەر بە بەڕێوەبەرایەتى گشتى ئاسایش، ئاگادارى هاوڵاتیان دەکاتەوە کە مامەڵەکردن لە هەموو جۆرە دراوێکى ئەلیکترۆنى و کانزایى (فۆرێکس) و (USDT)، قەدەغەیە.
ئاشکراشى کردووە، کۆمپانیاکانى فۆرێکس و دراوى ئەلیکترۆنى لە عێراق و هەرێمى کوردستان رێگەپێدراو نین و مۆڵەتى فەرمییان نییە.
“بەپێى بڕیارى رێنماییەکانى بانکى ناوەندى عێراق و وەزارەتى دارایى و ئابورى هەرێمى کوردستان و عێراق، رێگەپێدراو نین و هیچ رێنماییەک نییە بۆ رێکخستنى ئەم جۆرە چالاکیانە”، ئاسایشى هەولێر وادەڵێت.
سەبارەى بەو کۆمپانیایانەى لەژێر ناوى جیاجیا کارى فۆرێکس و کردنەوەى خولى فێربوونى چۆنییەتى مامەڵەکردن و کڕینى دراوى ئەلیکترۆنى و کانزیى ئەنجام دەدەن، ئاسایش دەڵێت، نایاسایین و رێگەپێدراو نین.
ئەوەش باسکراوە، دواى چەندین سکاڵاى هاوڵاتیان و زەرەرمەندبوونیان، لەرێگەى ئەم کۆمپانیا و بڕۆکەرانە، ئەم بڕیارانە دراون.
داواش لە هاوڵاتیان دەکەن، بۆ ئەوەى توشى زیانى مادى نەبن، دووربکەونەوە لەم جۆرە مامەڵانە و پارەکانیان بەفیڕۆ نەدەن.
