لە هەڵەبجە گەنجان فێری پیشەی جیاواز دەکرێن

ژێوار خدر

لە سنووری پارێزگای هەڵەبجە، گەنجان فێری پیشەی جیاواز دەکرێن، بەڕێوبەرایەتیی کار و راهێنانی پیشەیی پارێزگاکە، مانگانە راهێنانی هەمەجۆر دەکاتەوە و هەر جارە و کۆمەڵێک گەنجی سنوورەکە بەشداری راهێنانەکان دەکەن، لە ماوەی دوو ساڵدا نزیکەی 700 گەنج فێری چەندین پیشەی جیاواز کراون.

فەرحان نەسرەدین، وتەبێژی بەڕێوبەرایەتیی کار و راهێنانی پیشەیی هەڵەبجە بە 964ـی وت، ئەمڕۆ یەکشەممە 1.12.2024، بە هاوکاری رێکخراوێکی ئیسلامی چوار خولی جیاوازمان دەستپێکردووە و 60 گەنجیش لە سنووری پارێزگاکە بەشدارییان کردووە.

وتیشی، خولەکان پێکهاتوون لە خولی راهێنان لە بوارەکانی چاکردنەوەی مۆبایل، بەرهەمهێنانی قارچک، گرافیک دیزاین و وزەی خۆر و 15 بەشداربوو بۆ هەر خولێکیان بەشدارییان کردووە هەر یەکەیان بۆ ماوەی 30 رۆژی کرداری بەردەوام دەبن.

روونیشیکردەوە، ئەوان دوو جۆر خولیان هەیە، کە بەشێكیان حکومین و بەشەکەی دیکەشیان رێکخراوەیین و لەلایەن رێکخراوەکانەوە بودجەیان بۆ دابین دەکرێت.

ئاماژەی بەوەش دا، ئەو کەسانەی دەیانەوێت بەشداری خولەکان بکەن، پێویستە فۆڕمێک پڕ بکەنەوە کە بە شیوازی ئۆنڵاین لەلایەن بەڕێوەبەرایەتییەکەیانەوە بڵاویدەکەینەوە و دوای هەڵسەنگاندن بەپێی ئاست و شارەزایی کەسەکان بەشداربووەکان هەڵدەبژێردرێن.

“بەشێک لە خولەکانمان پاکێجی خستنەسەرکاریان لەگەڵە و ئەو کەسانەی بەشداریی دەکەن، بۆ ماوەیەک بە شێوەی ئەزموونی دەخرێنە سەر کار و ئەگەر توانیان سەرکەوتوو بن، دەتوانن ببن بە کارمەندی هەمیشەیی و ئەم پاکیچەش تەنیا لەلایەن بەشیک لەو رێکخراوانەوەیە کە خولەکان دەکەنەوە” فەرحان نەسرەدین وای وت.

بەڕێوەبەرایەتیی راهێنان و کاری پیشەیی هەڵەبجە، لە ماوەی دوو ساڵی دامەزراندنیەوە زیاتر لە 50 خولی جیاوازی لە سەرجەم بوارەکاندا کردووەتەوە، و نزیک 700 کەسیش لە تەمەنەکانی نێوان 18 بۆ 45 ساڵیدا بەشادری خولەکانیان کردووە.