دیمەنی بەشێک لە مینە دۆزراوەکان وێنە: دەزگای گشتی ئاسایشی مین
لە سنووری ئیدارەی سۆران
45 مین و پاشماوەی تەقەمەنی جەنگی چارەسەر کران
+964
ژێوار خدر
دەزگای گشتی کاروباری مین رایگەیاند، بەڕێوەبەرایەتی هەولێر لە چەند چالاکیەکی جیاوازدا، ژمارەیەکی زۆر مین و پاشماوەی تەقەمەنی جەنگیان لە سنوری ئیدارەی سەربەخۆی سۆران چارەسەر کردووە.
دەشڵێت، لەلایەن هاوڵاتیان و بەڕێوەبەرایەتی ناحیەی گەڵالە و چاودێرانی سەلامەتی ئاگادار کراونەتەوە لە بوونی چەند مینێکی نەتەقاوە، ئەوانیش لەماوەی دوو رۆژدا چوار چالاکی جیاوازییان ئەنجامداوە بۆ چارەسەر کردنی ئەو مین و پاشماوە جەنگییانە کە پێک هاتوون لە:
٭ پووچەڵکردنەوەی هەشت مینی دژەکەسی لە جۆری SB33 لە کێلگە مینی بەری خیزی لە گوندی ناوبەرگەی سەر بە قەزای چۆمان، کە لە کاتی کارکردنی تیمی میکانیکەڵ دۆزرابوونەوە.
٭ گواستنەوەی هەشت پاشماوەی تەقەمەنی جەنگی لە سنوری قەزای چۆمان.
٭ گواستنەوەی 26 مینی دژەکەسی لە جۆری V69 لە سەنتەری ناحیەی گەڵالە کە لەکاتی هەڵکەندنی زەوی دەرکەتبوون.
٭ گواستنەوەی سێ پاشماوەی تەقەمەنی جەنگی لە سەنتەری ناحیەی سیدەکان کە لەکاتی هەڵکەندنی زەوی دەرکەتبوون.
بەڕێوەبەرایەتییەکە روونیشیکردووەتەوە، سەرجەم چالاکیەکان بە سەلامەتی و بێ زیان ئەنجامدراون.
