مامۆستای خۆبەخش لە ناوەندەکانی خوێندنی کەرکوک وەرناگیرێن

ئەحمەد مستەفا

بەپێى نووسراوێکی پەروەردەی کەرکوک، ئەمساڵ هیچ خۆبەخشێک وەک “مامۆستای خۆبەخش” نابێت لە ناوەندەکانى خوێندن وەربگیردرێ، بە پێچەوانەوە لێپرسینەوە لەگەڵ ئیدارەی باخچە و قوتابخانەکە دەکرێ.

ئەمڕۆ 9.9.2024، لە پەروەردەی گشتی کەرکوکەوە بەڕێوەبەی گشتی واژۆی کردووە و گشتاندنەکە بۆ سەرجەم کارگێڕیی باخچەی منداڵان و قوتابخانە و خوێندنگەکان نێردراوە.

بەڕێوەبەرایەتیی گشتیی پەروەردەی کەرکوک لە نووسراوەکەدا ئاگاداریان دەکاتەوە، پابەندی رێنماییەکانی وەزارەتی پەروەردەی عێراق بن کە بە نووسراو گشتاندنی بۆ کراوە و تێدا داوا دەکات، “بە هیچ شێوەیەک لارینەبوون نەدرێتە مامۆستای خۆبەخش و هەر بەڕێوەبەر و سەرپەرشتیاری پەروەردەیی سەرپێچیی بڕیارەکە بکات، لێکۆڵینەوەی یاسایی لەگەڵدا دەکرێت”.

ئەوە لە کاتێکدایە زوو زوو، بەشێک لە وانەبێژان و خۆبەخشانی خوێندنی کوردی و عەرەبی و پاسەوانانی قوتابخانەکان لە بەردەم بینای بەڕێوەبەرایەتیی گشتیی پەروەردەی کەرکوک گرد دەبنەوە و داوا دەکەن وەزیری پەروەردە ببینن و دایانبمەزرێنێت.