دیمهنی یهكێك لهرێگاى كوێستانه‌كانى چۆمان... وێنه: قایمقامییهتى چۆمان
ماڵه ره‌وه‌ندى لێنه
رێگاى به‌شێك له كوێستانه‌كانى سنوورى چۆمان چاكده‌كرێت
964+
فه‌رهاد حه‌سه‌ن
له سنوورى قه‌زاى چۆمان ده‌ست به چاككردنه‌وه‌ى ئه‌و رێگایانه كراوه كه بۆ كوێستانه‌كان ده‌چن، قایمقامیش ده‌ڵێت، ساڵانه ره‌وه‌ندێكی زۆر له‌سه‌ر ئه‌م رێگایانه‌ن و پێویستیان به چاككردنه‌وه هه‌یه.
له سنوورى قه‌زاى چۆمان ژماره‌یه‌كی زۆرى ناوچه‌ى كوێستانى هه‌یه به‌شێكیان كه‌وتوونه‌ته سه‌ر سنووره‌كانى نێوان هه‌رێمی كوردستان و ئێران.
ئه‌حمه‌د بارزان عه‌لیكۆ، قایمقامى چۆمان به 964ـى راگه‌یاند، ساڵانه ئه‌م رێگایانه به‌هۆى به‌فر و بارانه‌وه تێكده‌چن و پێویستیان به چاككردن و نۆژه‌نكردنه‌وه هه‌یه، له ئێستاشدا كار له‌سه‌ر رێگاى ئه‌و كوێستانانه ده‌كه‌ن كه كه‌وتوونه‌ته گوندى ناوه‌ند له سنوورى ناحیه‌ى حاجى ئۆمه‌ران.
وتیشی “ژماره‌یه‌كی زۆرى ماڵه ره‌وه‌ند له‌و كوێستانانه خه‌ریكی كارى ئاژه‌ڵدارین و به‌هۆى هاتوچۆى به‌رده‌وامیان پێویستیان به چاككردنه‌وه‌ى رێگاكان هه‌یه”.
ئاماژه‌ى به‌وه‌ش كرد، چاككردنه‌وه‌ى ئه‌م رێگایانه به تێكه‌ڵه‌رێژكردن ده‌كرێت.
هه‌ر له‌گه‌ڵ چاككردنى رێگاى كوێستانه‌كان، پڕۆژه‌ى كۆنكرێتكردنى كۆڵانى گونده‌كانى ئاشی و بڕه‌گویزیش له‌سنوورى هه‌مان ناحیه جێبه‌جێ ده‌كرێت و كه به‌شێك له‌و كۆڵانانه بۆیه‌كه‌مجاره كۆنكرێت ده‌كرێن.
