شاخەوانێک لە چیای دەماوەندی ئێران گیانی لەدەست دا

+964

گۆڤەند فەتاح – کۆیە

ئەمڕۆ دووشەممە 12.8.2024 هاوڵاتییەکی شاری کۆیە بە ناوی جەوهەر حەمەد، کە بەرپرسی یەکێک لە گرووپە شاخەوانییەکانی کۆیەیە، لە وڵاتی ئێران لە چیای دەماوەند لە کاتی سەرکەوتن بە شاخەکەدا گیانی لەدەست دا، بەڵام تا ئێستا دیار نییە جەڵدەی دڵ لێیداوە یان هەڵدێراوە.

فەرەج مەمەند، بەرپرسی گرووپێکی شاخەوانی کۆیەیە، بە 964ی وت، ئەو هاوڕێیەمان بە مەبەستی شاخەوانی و سەرکەوتن بەسەر چیاکەدا رۆیشتبوو، بەڵام بە داخەوە پێش گەیشتن بە لووتکەی چیاکە گیانی لەدەست دا، ئێمە لە پەیوەندیداین لەگەڵ خزمانی ئەو هاوڕێیەمان بەڵام تا ئێستا دیار نییە جەڵدەی دڵ لێیداوە یان خۆی لە چیاکە هەڵدێراوە.

چیای دەماوەند، بەرزترین چیای ئێرانە، بەشێک لە شاخەوانانی کوردستان بۆ مەبەستی شاخەوانی، سەردەکەون بەسەر چیاکەدا، بەڵام هەندێکجار بە هۆی سەختيی چیاکە و نالەباری کەشوهەواوە، شاخەوانان لەو چیایە تووشی کارەسات دەبن.

پێداچوونەوە: ئەرسەلان عەبدوڵا

شاخەوانان لەسەر لوتکەی گۆیژە هاوخەمی خۆیان راگەیاند