لە ماڵی ئارام دەست بە وەرگرتنی بەخشراوەکان دەکرێت

پێشەوا محەمەد

ماڵی ئارام لە چەمچەماڵ ئامادەی وەرگرتنی بەخشراوەکانە، بەڕێوەبەری چاودێریی قایمقامیەتی چەمچەماڵ دەڵێت، هەندێ وردەکاریی کەمیان ماوە و دوای تەواوبوون بەخشراوەکان وەردەگرن.

ماڵی ئارام لە ساڵی 2020ـەوە فەرمانی کردنەوەی دراوە، بەڵام ئامادەبوون و دابینکردنی پێداویستی و بیناکەی تا مانگی یەکی ئەمساڵ دواکەوت و لە لایەن وەزیری کار و کاروباری کۆمەڵایەتییەوە کرایەوە.

“ماڵی ئارام جێگای 40 بەخشراو دەبێت و لەوێ خزمەت دەکرێن و هەموو خزمەتگوزارییەکیان بۆ ئامادە کراوە پێشکەشیان بکرێت”، ئەوە قسەی رەمەک رەمەزان، قایمقامی چەمچەماڵە بۆ 964.

وتیشی، “بەخشراوەکان چینێکی دیاری کۆمەڵگەن و پێویستە بە رێزەوە سەیر بکرێن و خزمەت بکرێن و چیتر لە شوێنە گشتییەکان و کۆڵان و شەقامەکان نەبنە جێگەی توانج و پلاری کەسانی دی یان بێ جێگە و شوێن بن”.

964 دەزانێت، ماڵی ئارام 10 کارمەندی بۆ دامەزرێندراوە و ئەو بینایەی بۆی دیاری کراوە، نۆژەن کراوەتەوە و بە تەواوی پێویستییەکانەوە ئامادە کراوە بۆ پێشوازیکردن و وەرگرتنی بەخشراوەکانی سنوورەکە.