لە هاویندا ئاویان بۆ دادەنێت و لە زستاندا خواردن
چیرۆکى ئەو کەسەى 28 ساڵە خزمەتى ئاژەڵە کێوییەکان دەکات
964+
هیڤی دێوالی-دهۆک
ئاژەڵدۆستێک 28 ساڵە خزمەت بە ئاژەڵە کێوییەکانى گوندى کانیا ماڵاى سنوورى قەزاى ئامێدى دەکات، بە شێوەیەک لە هاویندا ئاو بۆ ئاژەڵە کێوییەکان دادەنێت و لە زستان و وەرزى بەفربارینیش، دانەوێڵە خواردن بۆ ئاژەڵ و باڵندەکان دادەنێت.
شڤان سادق، ئاژەڵدۆستەکەى ئامێدییە و لە بارەى کارەکەیەوە قسەى بۆ 964 کردووە و دەڵێت: لە ساڵى 1996ـەوە، کەسایەتییەکى ئامێدى بڕیاری دا کە راوکردن ئاژەڵ و باڵندەى کێوى لە ناوچەکەمان قەدەغە بکرێت، هەر ئەوکات من راسپێردرام خۆبەخشانە چاودێریى ئاژەڵەکان بکەم و خەڵکى وشیار بکەمەوە کە راوى ئاژەڵە کێوییەکان نەکەن.
ئەو ئاژەڵدۆستە، رۆژانە لەسەر ئەرکى خۆی و بە شێوەیەکى خۆبەخشانە چاودێرى ئاژەڵە کێوییەکانى سنوورەکەى دەکات، وەک خۆى باسى دەکات، پێشتر ئاویان دەبرد بۆ شاخەکان، بەڵام ئێستا بیریان لێداوە و بە بۆڕى ئاویان بۆ ئاژەڵە کێوییەکان دابین کردووە، بەتایبەت لە چەند شوێنێکى گوندى کانیا ماڵا.
شڤان، رۆژانە سەردانى بیرەکان و ئەو شوێنانە دەکات، کە ئاویان بۆ دەچێت و چاودێریى ئەوە دەکات کە ئاوى پێویست بۆ ئاژەڵەکان هەیە یان نا.
ئەو ئاژەڵدۆستە، لە وەرزى زستانیشدا، خۆراک و دانەوێڵە دەباتە ئەو جێگایانەى بەفرى لێ باریوە و ئاژەڵەکان لە برسێتى رزگار دەکات و هۆکارێکە بۆ زیادبوون و مانەوەى ئاژەڵە کێوییەکانى سنوورەکە.
پێداچوونەوە: وریا فەتاح
