چیای زاوا لە دهۆک .وێنە :964
قۆناغی دووەم دەستپێدەکات
پرۆژە گەشتیاریەکەی چیای زاوا بەردەوامە
964+
زەید کۆچەر – دهۆک
لە چیای زاوا پرۆژەیەکی گەورەی گەشتیاری دروست دەکرێت، ئێستا قۆناغی یەکەمی کۆتایی هاتووە کە پێکهاتووە لە تەلەفریک و هەپی، پارکی چیای زاوا شوێنی مانەوەی هاوڵاتیانی تیادایە.
ئێستا بڕیارە قۆناغی دووەمی پرۆژەکە دەست پێبکات و چەندان هۆتێل و مۆتێل و خواردنگە و کافتریای دروست دەکرێت.
شەماڵ هروری بەرپرسی راگەیاندنی گەشتوگوزاری دهۆک بە 964ـی وت، بناری چیای زاوا پرۆژەیەکی گەورەی گەشتیارییە، ئەم پرۆژەیە بووەتە هۆی ئەوەی گەشتیاری زیاتر روو لە پارێزگای دهۆک بکەن و هەروەها شوێنێکی دڵرفێنە و گەنجان و خێزانەکانیش سەردانی دەکەن لە هەرچوار وەرزی ساڵ.
وتیشی، ئێستا قۆناغی دووەم لە پرۆژەی گەشتیاری چیای زاوا دەست پێدەکات کە بریتییە لە دروست کردنی هۆتێل و مۆتێل و کافتریا و خواردنگەی سەردەمیانە و هەروەها شاری یاری منداڵان بە جوانترین شێوە و کوالێتی کە دەبێتە پرۆژەیەکی گرنگی گەشتیاری و گەشتیاری زیاتر دەهێنێتە پارێزگای دهۆک.
پرۆژەکە ئامادەیە و تەنیا ماوە بەلێندەر وەری بگرێت و کارەکانی خۆی ئەنجام بدات، شەماڵ هروری وا دەڵێت.
لە ساڵی 2023دا ژمارەی ئەو گەشتیارانەی روویان لە پارێزگای دهۆک کردبوو تاوەکو مانگی 12 نزیکەی دوو ملیۆن و 500 هەزار گەشتیار بوون.
پێداچوونەوە: توانا نەقی
