ژمارەیەک کارمەند لە کاتی روواندنی نەمامدا لە رانییە - وێنە: فەرمانگەی ژینگەی راپەڕین
پڕۆژەی لەبری سەوزکردنە
لە رانییە شەش هەزار مەتر زەوی سەوز کرا
964+
پێشەوا محەمەد
ئەمڕۆ پێنجشەممە لە شاری رانییە شەش هەزار مەتر زەوی لە پڕۆژەی لەبری سەوزکردن لە لایەن کۆمپانیای کۆڕەک تیلیکۆمەوە سەوز کرا.
سەوزکردنەکە لە دوورگەی ناوەندی بەردەم نەخۆشخانەی لەدایکبوون و منداڵان ئەنجام درا، 250 درەختی بەرز و 380 نەمامی نزمی جۆری ئەریزۆنای لێ رووێندرا.
محەمەد کەریم، بەڕێوەبەری فەرمانگەی ژینگەی راپەڕین بۆ 964ـی ئاشکرا کرد، بەشێکی ئەو دوورگەی نێوان شەقامەکە دەکرێت بە چیمەن بۆ دانیشتنی هاوڵاتیان و چواردەورەکەشی هەر بە دار پەرژین دەکرێت.
وتیشی، “تانکییەکی ئاوی بۆ دادەندرێت و سیستمی قەترەی بۆ دەبەسترێت، کۆمپانیاکە کارمەندێکیشی بۆ دادەمەزرێنێت و بۆ ماوەی ساڵێک خزمەت و ئاودان و پاراستنی لە ئەستۆی خۆیدا دەبێت”.
پڕۆژەی لەبری سەوزکردن بە رێنمایی دەستەی ژینگەی هەرێم جێبەجێ دەکرێت، هەر پڕۆژەیەک نەتوانێت 25%ـی کۆی رووبەری پڕۆژەکەی بکات بە سەوزایی لە دەرەوەی پڕۆژەکەی شوێنی بۆ دیاری دەکرێت و پێی سەوز دەکرێت.
“لە ساڵی نوێشدا لەسەر جێبەجێکردنی ئەو رێنماییە بەردەوام دەبین و لەبری سەوزایی بەو پڕۆژانە جێبەجێ دەکەین کە سەوزایی پێویستیان جێبەجێ نەکردووە”، ئەوەش قسەی محەمەد کەریمە.
