سەنتەری کۆنتڕۆڵی کارەبا لە هەولێر. فۆتۆ:964
پارێزگاری هه‌ولێر: ده‌بێت كاره‌بای 24 كاژمێری ته‌نیا له شوێنه خزمه‌تگوزارییه‌كان بمێنێت
964+
شۆڕش عه‌بدوڵا
ئومێد خۆشناو، پارێزگاری هەولێر ئه‌مڕۆ شه‌ممه بە 964ی راگه‌یاند، ئه‌وان پاڵپشتیی سیستمی پریپەید ده‌كه‌ن، بەڵام جیاکاری هەبووە، ئاشكراشی كرد جگه له نه‌خۆشخانه و چه‌ند شوێنێكی دیكه‌ی خزمه‌تگوزاری، نابێت كاری 24 كاتژمێری له هیچ شوێنێك بمێنێت.
پارێزگاری هه‌ولێر له باره‌ی كێشه‌كانی كاره‌بای شاری هه‌ولێر قسه‌ی كرد و ئاماژه‌ی به‌وه دا، پرۆژەكانی نیشتەجێبوونیش كاره‌بای 24 کاتژمێرییان کەم دەکرێته‌وه و نرخەکانیش کەمدەکرێنەوە.
ئەوەشی وت، هیچ شوێنێک و فەرمانگەیەکی حکومی کارەبای 24 کاتژمێریان نابێت، جگە لە نەخۆشخانەکان، دەروازە سنوورییەکان، فڕۆکەخانە، گرتووخانەکان و پرۆژەکانی ئاو.
ئومێد خۆشناو رایگه‌یاند، له‌گه‌ڵ وه‌زیری كاره‌با كوبوونه‌ته‌وه و بڕیاریان داوه تا شەممەی داهاتوو، هەر کەسێک کارەبای زیادەڕۆی هەبێت و نەیبڕێت، سزا ده‌درێت و پێبژاردنی بۆ ده‌كه‌ن، کە كرێی دوو ساڵ كاره‌بای له‌سه‌ر حیساب ده‌كرێت.
پارێزگاری هه‌ولێر هه‌روه‌ها باسی ئه‌وه‌ی كرد، هه‌ولێر پێویستی به 3000 مێگواته و ئێستا 800 مێگواتی هه‌یه، ره‌تیشیكرده‌وه كاره‌بای هه‌رێم بفرۆشرێته شاره‌كانی موسڵ و كه‌ركوك.
خۆشناو تیشكی خسته‌سه‌ر ئه‌وه‌ی پێویسته كاره‌بای شاره‌كان به دادپه‌روه‌ری دابه‌ش بكرێت و ناكرێت شارێك له شارێكی دیكه كاره‌بای زیاتر یان كه‌متر بێت.
پارێزگاری هه‌ولێر ئه‌مڕۆ ئه‌م قسانه‌ی له سه‌نته‌ری كۆنتڕۆڵی كاره‌با كرد، كه سه‌ردانی ئه‌وێی كرد.
داڕشتنه‌وه: ئه‌رسه‌لان عه‌بدوڵا
