ئۆتۆمبێلێک لەکاتی بەنزین تێکردن. وێنە :964
بەنزینەکەی خراپ بووە
بەنزینخانەیەکی کۆیە 600 هەزار دینار پێبژاردنی بۆ کرا
964+
هاوبەش ئەبوبەکر
لە سنوری ناحیەی سکتان، لە قەزای کۆیە بەنزینخانەیەک بەنزینی کوالیتی خراپی بە هاوڵاتیان فرۆشتووە، لەسەر ئەوە پێبژاردنی بۆ کرا.
ئەمڕۆ یەکشەممە 22.10.2023، تاریق حەیدەری، قایمقامی کۆیە بە 964ـی راگەیاند، لیژنەی سوتەمەنی قایمقامیەت نمونەی سوتەمەنی بەنزینخانەکەی بردووە بۆ تاقیگە و دوای گەڕانەوەی ئەنجامەکان، دەرکەوتووە کە بەنزینەکەی خراپە.
“بەنزینخانەکە بە بڕی 600 هەزار دینار سزای پێبژاردنی بۆ کرا و ئەمجارە داناخرێت، بەڵام لە ئەگەری دووبارەکردنەوەی سەرپێچی لەو جۆرە، داخستن و پێبژاردنیشی بەدواوە دەبێت”، قایمقامی کۆیە وای وت.
مانگی رابردووش، بەنزینخانەیەکی کۆیە بەهەمان هۆکار، بە بڕی یەک ملیۆن و 500 هەزار دینار پێبژاردنی بۆ کرا.
