ئۆتۆمبێل کەسێک دەکوژێت و جێی دەهێڵێت

964+
شۆڕش هەرکی – هەولێر

کاتژمێر 3:30 دوانیوەڕۆی ئەمڕۆ چوارشەممە، لەسەر شەقامی هەولێر – پیرمام، ئۆتۆمبێلێک کێشاویەتی بە هاوڵاتیەکدا و دواتر بەجێی هێشتووە، هاوڵاتیەکەش گیانی لەدەستدا.

لە سۆشیال میدیا ڤیدیۆی کەسێک بڵاوبووەوە، کە لەسەر شەقام گیانی لەدەستداوە و کەس بەهانایەوە نەچووە.

964 پەیوەندی کرد بە فریاکەوتنی خێرا، تەنیا ئەوەندەیان وت، “کاتێک گەیشتین گیانی لەدەستدابوو، دواتر شایەتحاڵێک کە خۆی لەسەر یەکێک لە پرۆژەکانی نزیک ئەوێ بووە و ئەندازیار بووە، بە ئێمەی وت، ”رووداوەکە کاتژمێر 3:30 دوانیوەڕۆ بوو، تا ئێمە پێی گەیشتین گیانی لەدەستدابوو، راستەوخۆ فریاکەوتنمان ئاگادارکردەوە”.

رووداوەکە لەنزیک زین سیتی بووە، لەسەر شەقامی هەولێر – پیرمام، لەو شوێنەی رووداوەکە لێی روویداوە، هیچ پردێکی پەڕینەوەی هاوڵاتیانی تێدانییە.