چریکەیەکی قەتار و خاوکەری گەرمیان خەریکە خامۆش دەبێت

964+

توانا نەقی

هونەرمەندی مەقامبێژی کورد شوکور خەیات لە نەخۆشخانەیە و بارودۆخی تەندروستی بە تەواوەتی تێکچووە.

کەسوکارەکەی دەڵێن نەخۆشی درێژ خایەنی هەیە و لەدەرەوەی وڵاتیش چارەسەر نەکراوە، ئێستا لە نەخۆشخانەیەکی هەولێر لە ژێر چاودێری چڕی پزیشکیدایە.

فاروق شوکر خەیات کوڕی ئەو هونەرمەندە بە 964ـی وت، دکتۆرەکان بێ ئومێدیان کردوون و باروودۆخی تەندروستی باوکیان زۆر خراپە و لە ژێر چاودێری چڕی پزیشکیدایە.

وتیشی، چوار مانگە ئەو نەخۆشییەی گرتووە و ماوەی 8 رۆژە بە تەواوەتی بێهۆشە و حاڵی پەرێشان بووە.

هونەر مەند شوکر خەیات لە دایک بووی کەرکوکە و ئێستا لە هەولێر دەژی لە ساڵی 1940 لەدایک بووە.

شوکر خەیات لە دوای عەلی مەردان و حسێن عەلی و مەقام بێژانی سەدەی پێشوی گەرمیان و کەرکوک بە یەکێک لە مەقامبێژە بەسەلیقە و شارەزاکانی مەقاماتی ناوچەی گەرمیان دادەنرێت.

مەقامەکانی قەتار و خاوکەر، ئەڵاوەیسی، خورشیدی و خاوکەر و ئای ئای بە شێوازێک چڕیوە کە بۆنی گەرمای گەرمیان و چریکەی گەرمەسێر و پێدەشتی داودەی لێدێت.