هیچ تەقینەوەیەک لە مەلەوانگەکەی کەلار نەبووە
+964
میلاد جەلال
لە کاتی شۆردنی مەلەوانگەیەک لە قەزای کەلار، بۆنەکە بڵاودەبێتەوە و بەهۆیەوە چوار ژن رەوانەی نەخۆشخانە کراون.
ئێستا مەلەوانگەکە کراوەیە و لە هەردوو بەشی ژنان و پیاوانیش هاوڵاتیان مەلەی خۆیان دەکەن
964 دەزانێت، چوار ژنەکە تووشی هەناسەتەنگی بوون و ئێستا لەژێر چاودێریدان.
دووان لە ژنەکان لە بیستەکانی تەمەنیاندان و دووانەکەی دیکەش نزیک بە 40 ساڵانن.
رزگار لەتیف وتەبێژی نەخۆشخانەی شەهید هەژار لە کەلار بە 964ـی وت، ئەو چوار ژنەی هێنراونەتە نەخۆشخانە لەژێر ئۆکسجینن و چارەسەری پێویستیان بۆ دەکرێت.
سەرەتا هەواڵەکە وا بڵاوکرایەوە کە تانکیەکی کلۆر تەقیوەتەوە، بەڵام چەند شایەتحاڵێک بە 964یان وت، هیچ شتێک نەتەقیوەتەوە و هۆکارەکە رژاندنی کلۆر بووە.