شەقامەکانی ناوبازاڕی بازیان بۆ تێست کران بە یەک ئاڕاستە

964+

رێژوان مامە قادر – سلێمانی

لە ئەمڕۆ یەکشەممەوە، تا هەفتەیەک شەقامەکانی ناو بازاڕی بازیان دەکرێن بە یەک ئاڕاستە و ئەگەر سەرکەوتوو بێت بڕیارەکە دەکرێت بە یەکجاری.

بازاڕەکە قەرەباڵغ بووە و هاتوچۆی ئۆتۆمبێلیش بە شێوەی دوو ئاڕاستە ئاستەنگی بۆ دوکاندار و هاتوچۆی هاوڵاتیان دروست کردووە، لەبەر ئەمەیە ئەو بڕیارە دراوە.

بەڵێن کەریم، بەڕێوەبەری هاتوچۆی بازیان بە 964ـی راگەیاند، بڕیارەکە دوای تاوتوێکردن دراوە و یەک هەفتە چاودێری دەکەن، بزانن کاریگەری لەسەر کەمکردنەوەی ئاستەنگی هاتوچۆی ناو بازاڕ دەبێت یان نا.

وتیشی، “بازاڕی بازیان بە شێوەی هەڕەمەکی بووە بە بازاڕ و گەراج و شوێنی وەستانی ئۆتۆمبێلی تێدا نییە و ئەوەش کێشەی بۆ هاتوچۆکەی دروستکردوە”.

پێداچوونەوە: هاوبەش ئەبوبەکر