دیلۆیت: داهاتی سێ مانگی نەوتی هەرێم 946 ملیۆن دۆلار بووە

هاوبەش ئەبوبەکر

لە چارەکی یەکەمی ئەمساڵدا، حکومەتی هەرێم لەڕێگەی فرۆشتنی نەوت زیاتر لە 946 ملیۆن دۆلار قازانجی کردووە.

بەپێی ئاماری بەرهەمهێنان، هەناردەکردن، خەرجی و فرۆشتنی نەوتی هەرێمی کوردستانی بۆ چارەگی یەكەمی ئەمساڵ کە لەلایەن کۆمپانیای دیلۆیت بڵاوکراوەتەوە، کۆی بەرهەمی نەوت 36 ملیۆن و 723 هەزار و 475 بەرمیل بووە، بڕی هەناردەكردنیش 32 ملیۆن و 307 هەزار و 382 بەرمیل بووە.

ئامارەکەی دیلۆیت ئەمڕ پێنجشەممە 13.7.2023 لەلایەن فەرمانگەی میدیا و زانیاری بڵاوکراوەتەوە، پێماندەڵێت، لەو ماوەیەدا بڕی نەوتی تەرخانکراو بۆ پاڵاوگە چوار ملیۆن و 39 هەزار و 232 بەرمیل بووە، هەروەها بڕی فرۆشی ناوخۆ  376 هەزار و 861 بەرمیلە.

ئەم ئامارە بۆ سێ مانگی سەرەتای ئەمساڵە، واتە لە رێکەوتی 1.1.2023 تاوەکو 28.2.2023.

“داهاتی گشتیی نەوت لە هەرێمی كوردستان دوو ملیار و 199 ملیۆن و 684 هەزار و 396 دۆلار بووە، لە كاتێكدا تێکڕای نرخی بەرمیلێك نەوت 67.639 دۆلار بووە، لەم رێژەیەش داهاتی نەوتی ناوخۆ  22 ملیۆن و 98 هەزار و 456 دۆلار”، بەپێی ئامارەکەی دیلۆیت.

تێکڕای نرخی بەرمیلێك نەوتئ خاو بە 58.638 دۆلار دیاریکراوە و خەرجیی پڕۆسەی نەوتیش ملیارێك و 253 ملیۆن و 187 هەزار و 254 دۆلار بووە.