ئەمساڵ مۆڵەت بە 30 پڕۆژەی وەبەرهێنان دراوە

پێشەوا محەمەد

لە ماوەی حەوت مانگی ئەمساڵدا لە هەرێمی کوردستان مۆڵەت بە 30 پڕۆژەی وەبەرهێنان دراوە بە سەرمایەی 600 ملیۆن دۆلار.

لەو ژمارەیە هەشتیان پڕۆژەی پیشەسازی بوون و ئەوەکانی دیکەش کشتوکاڵی، نیشتەجێبوون و بازرگانی بوون.

دەستەی وەبەرهێنانی حکومەتی هەرێمی کوردستان لە بەرنامەیدایە ئەمساڵ مۆڵەت بە 200 پڕۆژەی وەبەرهێنان بدات و زیاتریش چاویان لە پڕۆژەی پیشەسازی، کشتوکاڵی و بازرگانییەکانە.

هەڤاڵ سدیق، بەڕێوەبەری گشتی مۆڵەت لە دەستەی وەبەرهێنان بە 964ـی وت، “کارنامەی کابینەی نۆ بە تایبەت لە وەبەرهێناندا زیاتر گرنگیدانە بە کشتوکاڵ، بازرگانی و پیشەسازی”.

روونیشیکردەوە، دەستەی وەبەرهێنان لە رێگەی نەخشەی وەبەرهێنانەوە پڕۆژەکان نمایش دەکات و دواتر ئۆفەر لە وەبەرهێنەران وەردەگرێت بۆ جێبەجێکردنیان.