سبەی دهۆک میوانداری کەربەلا دەکات

964+

فەرمان سادق

سبەی پێنجشەممە 29.6.2023، چوار یاری لە چوارچێوەی گەڕی 34ـی خولی نایابی عێراق ئەنجامدەدرێت، سێ یانەی کوردستان یاری دەکەن.

کاتژمێر 7:15ـی ئێوارەی سبەی پێنجشەممە، یانەی دهۆک لەسەر یاریگای خۆی میوانداری یانەی کەربەلا دەکات.

پێش ئەو یارییە، کاتژمێر 5ـی دوای نیوەڕۆ یانەی کارەبا میوانداری حدود دەکات، هەر هەمان رۆژ یانەی دیوانییە دەبێتە میوانی نەجەف کە بە فەرمی دابەزیوە بۆ پلە یەکی عێراق.

دوای یاری رۆژی پێنجشەممە، کاتژمێر 9:30 لەسەر یاریگای شەعب، یانەی زەوڕا میوانداری نەوتی میسان دەکات.

یانەی دهۆک بە 46 خاڵ لە پلەی هەشتەمی ریزبەندی دێت کە بە جیاوازی گۆڵ لە دواوەی هەولێرە، هاوکات یانەی کەربەلا بە 45 خاڵ لە پلەی نۆیەم دێت و بە بردنەوەی دهۆک دەخاتە دواوەی خۆی.

هاوکات رۆژی هەینی 30.6.2023، سێ یانەکەی تری کوردستان یاریان هەیە.

هەولێر دەبێتە میوانی سناعە، نەورۆزیش میوانداری یانەی نەوت دەکات و زاخۆش لەسەر یاریگای خۆی میوانداری نەوتی وەسەت دەکات.

یانەی شورتە بە 70 خاڵ لە پێشەنگی خولی پلە نایابی عێراقی دێت، یانەی هەولێریش بە 46 خاڵ لە پلەی حەوتەم دایە، هەرچی یانەی نەورۆزە بە 44 خاڵ لە پلەی دەیەم دێت و زاخۆش بە 37 خاڵ لە پلەی پانزەیەم دێت.

رکابەری لەسەر بوون بە پاڵەوانی خولی نایابی عێراق بۆ وەرزی 2022-2023، لەنێوان یانەی شورتە بە 70 خاڵ و قوە جەوییە بە 65 خاڵ دایە، لەو پێنج یارییەی ماوە کە دەکاتە 15 خاڵ، پێویستە شورتە 11 خاڵ بەدەستبهێنێت بۆ ئەوەی بێ ئاوڕدانەوە لە ئەنجامی یارییەکانی قوە جەوییە، ببێتە پاڵەوانی خولەکە.