ناو بازاڕی سلێمانی. وێنە: 964
سیستمى پریپەیدى کارەباى ناوبازاڕی سلێمانی دەکەوێتەکار
فەرمان سادق
بەڕێوەبەرایەتی کارەبای سلێمانی ئاگاداری خاوەن دوکانەکان دەکاتەوە کە لەمەولا سیستمی پریپەیدەکەیان کارایە.
بەڕێوەبەرایەتی کارەبای سلێمانی ئەوەش دەڵێت کە هەموو دوکانەکانی ناو بازاڕ ئامێری (CIU)ـیان وەرگرتووە و لە رێگەی ئەو ئامێرەوە دەتوانن زانیاری لەسەر بەکارهێنانی کارەبایەکەیان وەربگرن.
ئەو بەشەی ناو بازاڕی سلێمانی کە کارەبایەکەیان بووە بە پریپەید، لە فولکەى مامەڕیشە دەستپێدەکات تا دەگاتە فولکەى دەستەکە و پاشان شەقامى قەنات تا نەخۆشخانەى عەلى کەمال، پاشان دێتە خوارەوە بۆ خوار فولکەى خانەقا لاى تایە فرۆشەکان و پاشان دووبارە تا فولکەى مامەڕیشە.
بەڕێوەبەرایەتی کارەبای سلێمانی ئەمە بە زۆنی یەکەمی ناو بازاڕی سلێمانی ناو دەنێت، دەشڵێت: لەکاتى تەواوبوونى ئەو بڕەى کە وەک پێشەکى لە پێوەرەکەدا هەیە دەتوانن لە بنکەى فرۆشتنى کارتى باڵانسى کارەبا لە بازاڕى کوردۆ لە شەقامى مەولەوى بەرامبەر فەلافلى بنار کارت بکڕن.