ههڵبژاردهی عێراق - Social Media
وڵاتان بە پارەش یاری لەگەڵ عێراق ناکەن
964+
ئهرسهلان عهبدوڵا – ههولێر
هەڵبژاردەی تۆپی پێی میسر ناتوانێت یاری دۆستانه لهگهڵ ههڵبژاردهی عێراق بكات، بۆ ئهمهش داوای لێبوردنیان كرد و پارهیهكی زۆریشیان رهتكردهوه.
فیدراسیۆنی تۆپی پێی میسر له راگەیەندراوێکدا، كه میدیاكانی وڵاتهكهی بڵاویان كردەوه، داوای لێبوردنیان له فیدراسیۆنی عێراق کرد، به هۆی ئهوهی ناتوانن یارییهكی دۆستانه له شاری بهسڕه لهگهڵ ههڵبژاردهی عێراق بكهن.
ههڵبژاردهی عێراق ئۆفهری ١٠٠ ههزار دۆلاریان بۆ هاوتا میسرییهكهیان خستهڕوو، بۆ ئهوهی یارییهكی دۆستانه له شاری بهسڕهی باشوری عێراق بكهن، بهڵام به مهرجی ئهوهی محهمهد سهڵاحی ئهستێرهی میسر و یانهی لیڤهرپوولی ئینگلیزی لهگهڵ تیپهكه ئامادهی یارییهكه بێت، ئهگهریش ئاماده نهبێت، ئهوا عێراق ئۆفهرهكه دهكاته ٥٠ ههزار دۆلار.
“عێراق ههفتهی رابردووش نهیتوانی یارییهكی دۆستانه لهگهڵ ههڵبژاردهی كۆستاریكا له بهسڕه رێك بخات”
مهرجی ئامادهبوونی محهمهد سهڵاح، وایكرد لایهنی میسری یارییهكه رهت بكاتهوه.
ههڵبژاردهی عێراق ههفتهی رابردووش نهیتوانی یارییهكی دۆستانه لهگهڵ ههڵبژاردهی كۆستاریكا له بهسڕه رێك بخات، ههرچهنده زیاتر له ٣٠٠ ههزار دۆلاریان به تیپی بهرامبهر دا، بهڵام ههڵبژاردهی كۆستاریكا ئامادهنهبوون مۆری عێراق لهسهر پاسهپۆرتهكانیان بدرێت، ئهمهش بووه هۆی ئهوهی یارییهكه نهكرێت.
به هۆی بارودۆخی سیاسی و ئاسایشی عێراقهوه، زۆربهی تیپهكانی جیهان رهتی دهكهنهوه سهردانی عێراق بكهن، ئهمهش كێشهی بۆ ههڵبژاردهی عێراق دروست كردووه و ناتوانێت به پێی پێویست خۆی بۆ پاڵهوانیهتییهكان ئاماده بكات.