بەنزین هەرزان بووە لەگەڵ خۆیدا کوالێتیشی دابەزیوە

964+

فەرمان سادق

ماوەیەکە نرخی بەنزین بۆ خوار 700 دینار دابەزیوە، بەڵام وتەبێژی بەنزینخانەکان دەڵێت: نەفتای تێکەڵ دەکرێت و ئەمەش زیان لە ئۆتۆمبێلەکانتان دەدات.

لەگەڵ دابەزینی بەهای دۆلار بەرامبەر دینار، نرخی بەنزینیش دابەزیوە و پێشتر لیترێک بەنزینی نۆرماڵ لە گۆرەپانی سووتەمەنی فرۆشان بە سەرووی 800 دینار بوو بە کۆ، بەڵام ئێستا بە قسەی جەنگی مەجید، وتەبێژی بەنزینخانە ئەهلییەکانی هەولێر، ئێستا لیترێکی بە 770 دینارە.

بەگوێرەی بەدواداچوونێکی 964، دەرکەوتووە کە بەنزینی نۆرماڵی پاڵاوگەکانی لاناز، کار و بێجی عێراقی لە گۆڕەپانی سووتەمەنی فرۆشانی هەولێر هەیە کە نرخەکانیان لەنێوان 765 بۆ 775 دینارە.

دابەزینی نرخی بەنزین وایکردووە لە بازاڕدا جۆرێک بەنزین بفرۆشرێت کە نرخەکەی 695 دینارە، ئەمەش هەرزانترە لەو نرخەی کە بە کۆ لە گۆڕەپانی سووتەمەنی فرۆشانی هەولێر بە کۆ دەفرۆشرێت.

جەنگی مەجید، بە 964ـی وت، ئەو بەنزینەی بە 695 دینار دەفرۆشرێت، نەفتای تێکەڵ دەکرێت بۆ ئەوەی نرخەکەی هەرزان بکەن.

دەشڵێت: تێکەڵکردنی نەفتا لەگەڵ بەنزینەکە کاریگەری خراپ لەسەر ئۆتۆمبێلەکان دروستدەکات، لەوانە کێشی بزوێنەری ئۆتۆمبێلەکە لاواز دەکات، هەروەها بزوێنەرەکەی نەتر دەکات.

زیاتر وتی “بەنزینەکە دەسووتێت، بەڵام نەفتایەکە لەناو تانکیەکە دەمێنێتەوە، ئەمەش دیسان زیان بە ئۆتۆمبێلەکە دەگەیەنێت”.

ئێستا لە بازاڕدا، لەپاڵ بەنزینی بازرگانی کە نرخەکانیان جیاوازن، ئەوا دوو بەنزینی دیکەش هەیە کە هەردووکیان لە جۆری نۆرماڵن، یەکێکیان حکومەتی هەرێمی کوردستان دابەشی دەکات کە نرخەکەی 800 دینارە و ئەوەی دیکەش حکومەتی عێراق دابەشی دەکات کە نرخەکەی 690 دینارە.