90%ی یارمەتییەکان لە هەريرەوە دابین کرابوون

140 ملیۆن دیناریان دابه‌شی سه‌ر خێزانه‌ كه‌مده‌رامه‌ته‌كان كرد

964+

فه‌رهاد حه‌سه‌ن

چه‌ند گه‌نجێكی ناحیه‌ى هه‌ریر له‌ رۆژانى مانگى ره‌مه‌زاندا هاوكارى جیاجیایان به‌ بڕى 140 ملیۆن دیناریان بۆ خێزانه‌ كه‌مده‌رامه‌ته‌كانى سنووره‌كه‌یان كۆكرده‌وه‌ به‌سه‌ریاندا دابه‌شكردن، یه‌كێك له‌و گه‌نجانه‌ش ده‌ڵێت، 70% له‌و بڕه‌، پاره‌ بووه‌ و ئه‌وه‌ى دیکەش كه‌لوپه‌ل و خۆراك‌ بووە.

كەریم برایم مەرزانی، سەرۆكی رێكخراوی “هەریری من” كه‌ گه‌نجه‌كان له‌ رێگه‌یه‌وه‌ كۆمه‌ك و هاوكارییه‌كانیان بۆ ئه‌و خێزانانه‌ كۆكردووەته‌وه‌، بە 964ـی وت، ته‌نیا له‌ رۆژانى مانگى ره‌مه‌زاندا توانراوه‌ بڕی 140 ملیۆن دینار به‌سه‌ر ماڵه‌ كه‌مده‌رامه‌ته‌كانى هه‌ریر و سنووره‌كه‌ى دابه‌ش بكرێت.

وتیشی “له‌و بڕه‌ پاره‌یه‌ 70%ـى پاره‌ى كاش و ئه‌وه‌ى دیکەش كه‌لوپه‌لى جیاجیا و خۆراك بووه‌”.

به‌ قسه‌ى مه‌رزانى، ئه‌وان لیستێكیان له‌و خێزانه‌ كه‌مده‌رامه‌تانه‌ لایه‌، كه‌ ژماره‌یان 200 ماڵه‌ و شایسته‌ى هاوكاری و یارمه‌تیدانن، ده‌شڵێت “90%ـى یارمه‌تیه‌كان له‌ هه‌ريره‌وه‌ دابین كرابوون”.

ئاماژەی بەوەش دا، زۆربەی ئەوانه‌ى هاوكارى و یارمه‌تیان بۆ ئه‌و خێزانانه‌ ناردووه‌، حه‌زیان نه‌كردووه‌ ناویان بڵاوبكرێته‌وه‌.

وتیشی، لە ماوەی ساڵانی 2016 تا 2022 توانیویانە له‌ رێگه‌ى رێكخراوه‌كه‌یانه‌وه‌، زیاتر له‌ 622 ملیۆن دینار كۆبكەنەوە و دابەشی سەر خێزانە هەژار و كەمدەرامەتەكانی بكەن.

ناحیەی ھەریر، دەکەوێتە سنووری قەزای شەقڵاوە لە پارێزگای ھەولێر و ژمارەی دانیشتووانی بە 99 گوندی سنوورەكەیەوە، نزیکەی 35 هەزار کەسە .