لە سلێمانی مەیدانی نوێی ئاژەڵان دروستدەکرێت

964+

پێشەوا محەمەد – سلێمانی

لە شاری سلێمانی دەست بە جێبەجێکردنی مەیدانی نوێی ئاژەڵان کراوە و بڕیار وایە لە ماوەی ساڵێکدا تەواو بکرێت.

مەیدانی ئاژەڵانی ئێستای سلێمانی کەوتووەتە نزیک گەڕەکی وڵوبە لە بەشی رۆژئاوای سلێمانی، بەهۆی نزیکییەوە لە ناوچەی نیشتەجێبوون و ئەو بۆنەی هەیبوو، بێزاریی لای دانیشتوانی ئەو ناوچەیە دروست کردبوو و داوای گواستنەوەیان دەکرد.

مەیدانە نوێکە لە 15.3.2023ـەوە لەسەر رووبەری 80 دۆنم زەوی لە نزیک گوندی یەخی ماڵی سەر بە ناحیەی عەربەت دروستدەکرێت و بوودجەی پڕۆژەکەش 10 ملیار دینارە.

زەردەشت رەفیق، بەرپرسی راگەیاندنی شارەوانی سلێمانی بە تۆڕی 964ـی راگەیاند، شارەوانیی سلێمانی سەرپەرشتی دروستکردنی مەیدانەکە دەکات و بڕیار وایە بە کەمتر لە وادەی تەواوکراو جێبەجێبکرێت.