نرخی نەوت رووی لە بەرزبوونەوە کردەوە
دوای هەڕەشەکانی ترەمپ لە ئێران
نرخی نەوت رووی لە بەرزبوونەوە کردەوە
شۆڕش قادری
دوای دابەزینی نرخی نەوت لە چەند رۆژ رابردوودا، ئەمڕۆ رووی لە بەرزبوونەوە کردووەتەوە و نرخی هەر بەرمیلێک لە سەروو 88 دۆلارەوە مامەڵەی پێوەدەکرێت.
ئەمڕۆ شەممە 15.8.2026 و لەکاتی کردنەوەی بازاڕی جیهانیی نەوت، نرخی یەک بەرمیل نەوتی خاوی برێنت بە 88 دۆلار و 52 سەنت دیاری کراوە و نرخەکەی بەڕێژەی 1.67٪ بەرزبووەتەوە.
هەروەها یەک بەرمیل نەوتی سووکی تەکساس بە 82 دۆلار و 40 سەنت مامەڵەی پێوە دەکرێت و ئەویش نرخەکەی بەڕێژەی 1.42٪ بەرزبووەتەوە.
ئەم بەرزبوونەوەیەی نرخی نەوت دوای ئەوە دێت کە دۆناڵد ترەمپ سەرۆکی ئەمریکا دەستیکردەوە بە هەڕەشەکردن لە ئێران و رایگەیاند، “گورزی گەورە لە ئابووری ئێران دەدەین و بەمزووانە گەرووی هورمز وەک بەشێک لە خاکی ئەمریکا رادەگەیەنم”.