بارانبارین بەردەوام دەبێت؛ هەندێک جار لێزمەباران و هەورەبروسکەشی لەگەڵ دەبێت

شۆڕش قادری

ئەمڕۆ و سبەی بارانبارین لە زۆربەی ناوچەکانی کوردستان بەردەوام دەبێت و لە هەندێک شوێن بەخوڕ دەبێت و هەورەبروسکەشی لەگەڵ دەبێت.

وەک کەشناسی کوردستان پێشبینی کردووە، ئەمڕۆ پێنجشەممە 29.10.2026 ئاسمان پەڵەهەور و نیمچە هەور دەبێت پاشان دەگۆڕێت بۆ هەوری تەواو، پاشنیوەڕۆ بارانبارین لە ناوچەکانی باکووری هەرێم و پارێزگای دهۆک دەستپێدەکات، دواتر دەگاتە ناوچەکانی ئیدارەی سۆران و راپەڕین و بەشێکی سنووری پارێزگای سلێمانی، هەروەها لە سنووری پارێزگای هەولێر و دەورووبەری ئەگەر هەیە نمەباران ببارێت.

بۆ سبەى هەینیش، بارانبارین لە زۆربەی ناوچەکانی کوردستان بەردەوام دەبێت، سەرەتا لە سنووری پارێزگای دهۆک و ئیدارەی زاخۆوە دەستپێدەکاتەوە و پاشان کاریگەرییەکەی درێژ دەبێتەوە بۆ ناوچەکانی ئیدارەی سۆران و راپەڕین و پارێزگای سلێمانی و هەڵەبجە،  هەندێک کات تاوە باران دەبێت و هەورە بروسکەشی لەگەڵ دەبێت بە تایبەت لە ناوچەکانی باکووری هەرێم.

بەرزترین پلەکانی گەرمای پێشبینیکراو بە پلەی سیلیزی بۆ ئەمڕۆ؛

هەولێر: 25 پلەی سیلیزی

سلێمانی: 24 پلەی سیلیزی

دهۆک: 22 پلەی سیلیزی

هەڵەبجە: 26 پلەی سیلیزی

سۆران: 20 پلەی سیلیزی

پیرمام: 21 پلەی سیلیزی

چەمچەماڵ: 25 پلەی سیلیزی

زاخۆ: 22 پلەی سیلیزی

گەرمیان: 29 پلەی سیلیزی

حاجی ئۆمەران: 15 پلەی سیلیزی