کۆگای پاشماوە پزیشکییەکان لە تانجەرۆ دەگوازرێنەوە

دیلان محەممەد جەزا

بەڕێوەبەری ژینگەی سلێمانی بە 964ـی راگەیاند، پلانیان هەیە لە چەند مانگی داهاتوو کێشەی پاشماوە پزیشکییەکان لە تانجەرۆ چارەسەر بکەن و کۆگا و مەیدانەکان دووربخرێنەوە.

شایی ئاوات، بەرێوەبەری ژینگەی سلێمانی دەڵێت، “کۆگای پاشماوە پزیشکییەکان لە چەند مانگی داهاتوو لە تانجەرۆ نامێنن و پلان هەیە چەند کۆمپانیایەکی مۆدێرن پاشەرۆی پزیشکییەکان چارەسەر بکرێن بەبێ ئەوەی زیان بە تانجەرۆ بگەیەنرێن.”

بەڕێوەبەری ژینگەی سلێمانی وتی: لە ئێستادا کۆگا و مەیدانەکانی سووتەمەنی بەشێکیان لە تانجەرۆوە بۆ عەربەت گواستراونەتەوە و هەنگاوی داهاتوو گواستنەوەی کارگەکان دەستپێدەکات.

نزیکەی 120 کۆگا و مەیدانی سووتەمەنی لە سنووری سلێمانی هەن و 88ـیان مۆڵەتی فەرمییان هەیە و 45 دانەیان بۆ عەربەت گواستراونەتەوە.

لەبارەی ئەوانەی ماون شایی ئاوات دەڵێت: ئەگەر نەیەنە سەر خەت ناچاردەبین پێیان دابخەین، بۆیە باشترە خۆیان رێکارەکان جێبەجێ بکەن و بگوازنەوە بۆ عەربەت.

پێداچوونەوە: کاکەلاو عەبدوڵا