باران پێگەشتنى دواخستووە
زەرەر لە خورما ناکەن؛ خراپ بوو بیکەن بە دۆشاو
سیروان خورشید -ْخورماتوو
ئەمساڵ بەرهەمی خورما لە قەزای خورماتوو جیاوازە لە ساڵانی رابردوو بەهۆی کەمبوونی ماوەی وەرزی گەرما و درەنگ کۆتاییهاتنی شێی زستان بەشێکی زۆری جۆرەکانی خورما تاوەکو ئێستا پێنەگەیشتوون.
ئەرکان خەلیل، جوتیار و باخەوان لە سنووری خورماتووە، بۆ مایکی 964 قسەی کردووە و دەڵێت،” باخەکەم 200 دار و 13 جۆری جیاوازی خورمای تێدایە بە تام و ڕەنگی جۆراوجۆرەوە، لەوانەش “بەرحی، برێم، خەستاوی، زوهدی، قەسپ، حەلەوە” و چەند جۆرێکی تر.
دەشڵێت، خورما پێویستی بە گەرمایەکی باش هەیە، کەچی ئەمساڵ شێی زستان درەنگ لە ناوچەکاندا کۆتایی هات و وەرزی گەرماکەش لە چاو ساڵانی تر کەمتر بوو، سەرەڕای ئەمانەش، بڵاوبونەوەی جۆرە نەخۆشییەک لە دارخورماکاندا زیانی تری گەیاندووە و هۆکار بووە بۆ ئەوەی بەشێکی زۆری بەرهەمەکە نەگاتە قۆناغی پێگەیشتن.
ئاماژەی بەوەشکرد، ئەم دۆخە کەشوهەواییە و نەخۆشییەکان بوونەتە ئاستەنگ لە بەردەم پێگەیشتنی تەواوی بەرهەمی باخەکان و نیگەرانیی قووڵی لای باخەوانانی ناوچەکە دروست کردووە.
پێداچوونەوە: وریا فەتاح