یونس حەمەكاكە تەمەنی هەڵکشاوە و تەندروستی باش نییە

رازاو محەمەد – سلێمانی

هونەرمەند و ئەکتەری دیاری کوردستان یونس حەمەكاكە تەمەنی هەڵکشاوە و تەندروستیشی باش نییە، سەرباری وەزعی خۆی دڵی بۆ خەڵکی کوردستان پڕە و دەڵێت، خوا روحم بەو میللەتە بکات.

لەناو بازاڕی سلێمانی یونس حەمەكاكە قسەی بۆ مایکی 964 کردووە و دەڵێت، “دوو رۆژە دەچم بۆ موچە، هێشتا نەمتوانیوە وەریگرم، ئەمڕۆ پێیانوتم، کارتەکەت کێشەی هەیە  و تەنیا 15 هەزار دیناری تێدایە، بڕۆ دوو سێ رۆژی تر بۆت چارەسەر دەکەین”.

ئەو هونەرمەندە دڵناسکە بەزەیی بەو خەڵکەدا دێتەوە کە لە سەرەی وەرگرتنی موچە بە سەعات ماتڵ دەبن و بەگریانەوە دەڵێت، “ئەو خەڵکە دەبینم لە ریزی مەعاشدا، خەریکبوو ئاگرم تێبەربێ، پالیان بە پیرەمێردێکەوە نا، سەری دای بە عەرزدا”.

یونس حەمەكاكە لەلایەک بۆ وەزعی ئەو خەڵکە دڵی پڕە و لەلایەکی دیکەوە وەک خۆی دەڵێت، توانای نەماوە و ئەو فرمێسکانەی بۆ کارە هونەرییەکانیەتی.

یونس حەمەكاكە یەکێکە لە هونەرمەندە دیارەکانی کوردستان و بەشداری چەندین فیلم و درامای کردووە و لەوانەش، مەمی ئالان، کۆشکی هەنار و درامای ئارەزوو.

پێداچوونەوە؛ شۆڕش قادری