خۆبەخشانە هاوکاری ئەو کەسانە دەکات تەرمی ئازیزانیان لە ئەوروپا دەهێننەوە

فەرمان مەلاحەسەن – رانیە

تەرمی زۆربەی ئەو کۆچبەرە کوردانەی لە رێگای چوون بۆ ئەوروپا گیان لەدەستدەدەن، بە هاوکاری کەسانێکی خێرخواز و بۆ خواسوڵحاو، وەک حاجی عەدنان دەگەڕێندرێنەوە کوردستان.

یەکێک لەو گەنجە خێرلەخۆنەدیوانەی کوردستان، هیوا مینە بوو کە هەفتەی پێشوو لە بەریتانیا و لەکاتی کارکردندا گیانی لەدەستدا، ئەمڕۆ تەرمەکەی گەڕێندرایەوە رانیە و بەخاکسپێردرا.

حاجی عەدنان لەگەڵ تەرمەکەی هاتۆتەوە و قسەی بۆ مایکی 964 کردووە، ئەو دەڵێت، “27 ساڵە دانیشتووی بەریتانیام و 13 ساڵە خۆبەخشانە هاوکاری ئەو کەسانە دەکەم  کە دەیانەوێ تەرمی ئازیزانیان بگەڕێننەوە زێدی خۆیان”.

“وەرگرتنەوەی تەرم لە بەریتانیا کەمێک ناراحەتە و ئەنجامدانی کارە یاساییەکانی چەند رۆژێکی دەوێ”، حاجی عەدنان وادەڵێت.

ئاماژەی بەوەشکرد، هاوکاری هەموو ئەو کاسانە دەکات کە لە وڵاتانی دیکەش لێیان دەقەومێ و جارێک لە فەڕەنسا ویستوویانە تەرمی چەند کۆچبەرێک بسووتێنن، بەڵام ئەوان نەیاهێشتووە، تەرمەکانیان وەرگرتووەتەوە و ناردوویاننەوە بۆ کوردستان.

پێداچوونەوە؛ شۆڕش قادری